Vise-Prezidente Parlamentu Nasionál, Maria Angelina Lopez Sarmento. Foto Tatoli/ Egas Cristóvão

DILI, 22 janeiru 2020 (TATOLI)—Hafoin proposta Orsamentu Jerál Estadu (OJE) 2020 la pasa iha jeneralidade, Governu ho Parlamentu Nasionál (PN) seidauk iha komunikasaun ba malu to’o ohin loron.

Vise-Prezidente Parlamentu Nasionál, Maria Angelina Lopez Sarmento, haktuir katak iha segunda foin lalais ne’e, Meza Parlamentu kompostu hosi CNRT, PLP, KHUNTO no Frenti-Mudança, koko atu identifika ajenda ba plenária ne’ebé bele propoin iha reuniaun líder bankada.

“Ne’e atu dehan katak komunikasaun entre líder bankada sira ho Meza Parlamentu la’o hela, maibé komunikasaun entre Parlamentu Nasionál ho Governu sei vakum hela”, Maria Angelina Lopez ba jornalista sira, iha resintu Parlamentu Nasionál, kuarta ne’e.

Nia hatutan, Primeiru-Ministru orienta ona membru Governu sira kontinua hala’o serbisu tanba responsabilidade sei iha, tanba seidauk iha desizaun ida klaru kona-ba demisaun Governu, nune’e mós desizaun ba Parlamentu Nasionál.

Nia dehan, hein katak depois semana ida-ne’e ka semana oin karik Prezidente Repúblika konvoka tiha reuniaun bele halo fali situasaun ne’e normál hikas.

“Maibé ne’e depende ba partidu CNRT nia vontade polítika, tanba sira mak reprezenta bankada maioria hosi Aliansa Mudansa ba Progresu (AMP)”, nia haklaken.

Deputada PLP ne’e haktuir, meiu krítika halo ona dala-rua tutuir malu liuhosi konferénsia AMP nian iha Golgota no iha Tibar. Iha-ne’ebá iha krítika no auto-krítika entre bankada tolu fomenta Governu. Primeiru-Ministru nakloke no konsidera krítika sira-ne’e hotu.

“Soké, krítika sira liuhosi desizaun konferénsia mak hola iha Golgota no Tibar, Primeiru-Ministru rasik seidauk bele ezekuta, seidauk halo segimentu tanba ita duni hela oinsá mak responde uluk interese Estadu nian. Ita prenxe lai prazu atu aprezenta proposta Orsamentu Jerál Estadu 2020 nian. Tanba duni tempu ida-ne’e mak Primeiru-Ministru mós la konsege realiza no halo segimentu ba desizaun hosi Konsellu Diretiva nian no konferénsia AMP nian dala-rua tuituir malu ne’e”, deputada PLP ne’e argumenta.

Jornalista: Evaristo Soares Martins

Editór: Xisto Freitas

HAKEREK NO HATÁN

Please enter your comment!
Please enter your name here