Vise-Prezidente Parlamentu Nasionál, Maria Angelina Lopes Sarmento. Imajen Tatoli/Egas Cristóvão

DILI, 21 janeiru 2020 (TATOLI)—Deputadu sira hosi Partidu Frente Revolusionária Timor-Leste Independente (FRETILIN) no Partidu Libertasaun Populár (PLP) hateten nakloke ba diálogu tuir konvite ne’ebé Prezidente Repúblika, Francisco Gutreres Lú Olo, públika atu solusiona inserteza polítika iha rai-laran.

Prezidente Repúblika Sei Hahú Ronda Diálogu iha 23 Janeiru

“FRETILIN nakloke ba diálogu. Diálogu ne’ebé sériu no diálogu ne’ebé ho responsabilidade. Responsabilidade ba destinu povu no destinu nasaun nian ne’ebé orientadu ba interese superiór nasaun no povu”, Vise-Xefe Bankada FRETILIN, Francisco Miranda Branco, ba Agência Tatoli, iha Parlamentu Nasionál, kuarta ne’e.

Nune’e mós Deputada Bankada Partidu Libertasaun Populár (PLP), Maria Angelina Lopez Sarmento, hateten diálogu ne’e nesesáriu atu halo hodi solusiona situasaun polítika atuál.

Vise Xefe Bankada FRETILIN, Francisco Miranda Branco. Imajen/Egas Cristovão

Branco hatutan, ho diálogu ka liuhosi konsultasaun ida-ne’e bele akumula forsa polítika hotu-hotu, eis titulár sira, Igreja Katólika no reprezentante hotu-hotu atu deside destinu povu no Estadu ida-ne’e.

“Diálogu ida-ne’e la’ós ba grupu ida nian, la’ós partidu ida nian maibé ba interese nasionál atu labele sakrifika povu no atu labele sakrifika ita-nia Estadu. FRETILIN nia esperansa hotu-hotu tau aas interese nasionál no tau aas interese povu nian, sei hetan solusaun ne’ebé di’ak liubá Estadu ida-ne’e”, nia subliña.

Deputadu Bankada FRETILIN ne’e hatutan, Prezidente Repúblika iha loron-60 atu halo konsentrasaun ho forsa polítika hotu, Konsellu Estadu, sosiedade tomak, Igreja Katólika, veteranu sira, nune’e bele rekolla hanoin hotu-hotu hafoin foti desizaun.

“Bazeia ba ida-ne’e, sei hasai desizaun kompreensivu ne’ebé di’akliu ba ita hotu-hotu, ba ita-nia povu nia moris no ba Estadu nia moris. Ida-ne’e mak ita hein”, nia katak.

Entretantu, Maria Angelina Sarmento afirma: “Jerasaun tuan sira presiza husik lembransa di’ak ba jerasaun foun sira liuhosi buka-malu atu halo diálogu. Ita bele dehan demokrasia no kurridór konstitusionál maibé iha forsa polítika ida-ne’ebé iha kotuk, nia papél ne’e boot tebes, ne’ebé ita la hatudu diretamente, fízikamente permanese iha ita-nia oin maibé forsa ne’e iha hela”.

Tanba ne’e, tuir nia, presiza loke dalan atu líder nasionál sira-ne’e halo diálogu ba malu no bainhira diálogu entre líder na’in-haat ka lima ne’ebé mak xave ba prosesu ida-ne’e, sei solusiona buat hotu-hotu.

Jornalista: Evaristo Soares Martins

Editór: Xisto Freitas

HAKEREK NO HATÁN

Please enter your comment!
Please enter your name here