Diretór Jerál MOP, Rui Hernani. Imajen/Florencio Miranda Ximenes

DILI, 22 janeiru 2020 (TATOLI) – Diretór Jerál Ministériu Obra Públika (MOP), Rui Hernani F. Guterres, hateten ekipa téknika husi interministeriál finaliza ona rekolla dadus ba identifikasaun propriedade abitante ne’ebé afetada ba konstrusaun estrada iha parte rotunda Comoro to’o Tasitolu.

“Dadus ami foti hotu tiha ona ne’ebé agora tékniku sira elabora hela, semana oin ami ba konfirma dadus liuliu karater uma ne’e permanente ka uma privada ka uma estadu, rai no ai-horis sira atu konfirma dadus ho abitante afetadu sira atu hatene kompletu ona ka lae?”, Diretór Jerál Rui Hernani ba TATOLI, iha knaar fatin Faról, ohin.

Diretór Jerál ne’e dehan konfirmasaun dadus ne’e ho objetivu atu rezidente afetada ho tékniku sira haree dadus ne’ebé rekolla ne’e kompletu ona mak foin halo avaliasaun ba kustu sira hodi prosesa indenizasaun.

Finaliza dadus ne’e hodi haree dezeñu no karater uma, rai no ai-horis, depois halo konfirmasaun mak iha buat ruma falta hadi’a fali, mas loos hotu ona tenke prepara osan ba indenizasaun atu sira muda husi fatin ne’e

“Ami konfirma fali ba sira (abitante afetadu) konkorda ou la konkorda tanba Ministériu Obra Públika mós iha padraun ba indenizasaun hanesan uma permanente no semi permanente ne’e sei selu kada metru kuadradu, nune’e mós ba rai inklui ai-horis”, katak.

Nia dehan daudaun ne’e tempu limitadu tebes tanba obra portu Tibar remata ne’e projetu haluan estrada rotunda Comoro to’o Tasitolu mós tenke remata.

“Ami iha tempu hela de’it fulan 18 ona, ne’ebé tenke finaliza prosesu sira ne’e hotu, antes agostu 2021 obra tenke remata ona”, afirma.

Nune’e, nia apela ba hotu-hotu liuliu ekipa interministeriál no abitante afetada sira atu kontribui hodi finaliza lalais prosesu ne’e tanba ida ne’e ba interese nasionál.

Ekipa ministeriál ne’e envolve husi Ministériu Obra Publika (MOP), Ministériu Justisa, Ministériu Administrasaun Estatál, Ministériu Agrikultura no Peska (MAP), Prezidente Autoridade Munisípiu Dili, Administradór Postu Administrativu no Xefe Suku sira.

Entretantu, abitante ne’ebé afeta ba haluan estrada husi rotunda Comoro to’o Tasitolu ne’e kuaze 142 .

Antes ne’e, Ministru Obra Públika (MOP), Salvador Eugénio Soares dos Reis Pires, orienta ekipa interministeriál atu halais Comoro to’o Tasitolu.

Nia dehan Governu iha responsabilidade tenke prepara kondisaun infraestrutura estrada, molok portu Tibar ne’e tama iha operasaun iha 2021.

“Kuandu infraestrutura portu ne’e tama iha operasaun, iha akordu Governu tenke prepara no prontu ona ba sustenta operasaun portu Tibar nian, ida ne’e urjente uitoan, se lae Governu kona koima rihun $50 kada loron”, katak.

Tanba ne’e, nia husu ba ekipa MOP ho ministériu relevante sira para haree no rezolve prosesu resentimentu para kompañia sira bele tama halo konstrusaun estrada iha rotunda Komoro to’o Tasitolu.

Estrada Tasitolu to’o Rotunda Komoro ne’e kuaze kilómetru rua hamutuk ho pakote estrada trosu Tibar to’o Tasitolu ne’ebé ka’er husi kompañia internasionál China Wuyi ho kustu millaun $12-resin, hahú iha loron 28 fevereiru 2017 to’o outubru 2019.

Notísia relevante : Ekipa Interministeriál Identifika Propriedade Abitante Sira iha Rotunda Komoro-Tasitolu

Jornalista : Florencio Miranda Ximenes

Editora : Maria Auxiliadora

HAKEREK NO HATÁN

Please enter your comment!
Please enter your name here