Adjuntu Autoridade Munisípiu Dili, José Ximenes Pereira Smith, Imajen/Egas Cristovão

DILI, 22 janeiru 2020 (TATOLI) – Adjuntu Prezidente Munisipiu Dili, José Filipe Ximenes Smith, konsidera negosiante ki’ik sira aproveita tempu kalan hodi fa’an sasan iha dalan ninin tanba sira hatene Ekipa Gestaun Merkadu (EGM) Munisipiu Dili laiha kondisaun atu halo kontrolu ba sira.

“Loloos ne’e ita tenke iha kondisaun ida di’ak liu atu nune’e Ekipa Gestaun Merkadu (EGM) Munisipiu Dili bele iha kbi’it hodi hala’o ninia serbisu to’o tuku 10:00 kalan. Kondisaun ne’ebé atu apoiu EGM ninia serbisu mak tenke iha orsmentu inklui Polisia nia apoiu. Maibé kondisaun sira ne’e laiha, Munisipiu Dili labele halo buat ida,” Adjunto Autoridade Munisipiu Dili, José Filipe Ximenes Smith, dehan ba Agência TATOLI iha nia knar fatin, Matadoru, Balide, Dili, kuarta (22/01/2020).

Tanba, nia fó razaun, durante halo operasaun membru EGM barak mak sai vitima tanba balun hetan sona no hetan tuda. Entaun, nai dehan, sira-nia parte lakohi atu membru EGM ne’e hetan susar,” nia dehan.

Atu hakarak hetan kondisaun ida di’ak liu, nia husu ba Komando PNTL bele destaka ona ekipa permanente ida hamutuk ho EGM atu hala’o serbisu to’o iha tuku 10:00 kalan. Se lae, nia dehan, bainhira sira serbisu to’o tuku 17:30 lokraik de’it depois fila ona ba uma, iha oras livre sira ne’e mak negosiante sira aproveita hodi faan iha dalan ninin.

Nia rekuñese, agora daudaun ne’e Kapitál Dili sai ona fatin hodi fan sasan arbiru de’it. Negosiante sira, tuir nia, la tau ona interrese ba kondisaun Kapitál Dili nian. Tuir nia, daudaun ne’e Munisipiu Dili iha ona planu oin-oin maibé orsamentu atu apoiu mak laiha.

“Negosiante sira mesak matenek tantana de’it. Sira hatene didi’ak saida mak Munisipiu Dili hasoru. Bainhira ema hotu sai ona serbisu lokra’ik, negosiante sira hahú lori sira-nia sasan hodi aproveita faan iha dalan ninin. A’at liután mak komunidade kestiona negosiante fa’an iha dalan ninin maibé sira mós sempre ba sosa modo iha ne’ebá,” nia informa.

Notísia relevante:Ema La’o Ain Sira Preokupa Ho Trotoár Ne’ebé Uza Hodi Fa’an Sasan

Jornalista : Tomé Amado

Editór       : Rafy Belo

HAKEREK NO HATÁN

Please enter your comment!
Please enter your name here