DILI, 22 janeiru (TATOLI)—Xefe Bankada Parlamentár União Democrática Timorense/Frenti-Mudança (UDT/FM), Francisco David Xavier Carlos, hateten diálogu mak dalan úniku solusiona inserteza polítika iha rai-laran.

Partidu UDT simu ona konvite diálogu hosi Prezidente-Repúblika, Francisco Guterres ‘Lú Olo’, iha loron-segunda ne’e.

Reprezentante povu ne’e hatutan, karta ne’e Prezidente Repúblika konvida UDT ba diálogu atu haree situasaun atuál no orsamentu jerál ne’ebé xumba iha jeneralidade.

“Ita haree to’ok aban saida mak atu akontese. Konteúdu hosi karta ne’e la hateten buat-ida. Só konvida para halo diálogu. Diálogu atu responde ba situasaun polítika iha rai-laran nian”, nia  dehan ba jornalista sira iha resintu Parlamentu Nasionál, kuarta ne’e.

Nia haklaken, talves diálogu ne’e bele hamosu buat ruma hafoin Prezidente Repúblika foti desizaun iha futuru.

“Laiha dúvida. Kazu ne’ebé ita hasoru ba ne’e kompeténsia tomak Prezidente Repúblika nian. Prezidente bolu partidu polítiku sira hotu no líder nasionál sira para nia bele análize sobre situasaun saida mak ita-nia hakarak ka maioria partidu polítiku sira-nia hakarak saida ba povu rai ida-ne’e”, Xefe Bankada Parlamentár UDT/FM ne’e subliña.

Jornalista: Evaristo Soares Martins

Editór: Xisto Freitas

HAKEREK NO HATÁN

Please enter your comment!
Please enter your name here