Pesoál saneamentu dasa hela fo’er. Foto/Google.

DILI, 22 janeiru 2020 (TATOLI) – Autoridade Munisípiu Dili deside sei hapara kontratu ho timoroan na’in 140 ne’ebé tama iha Ekipa Forsa Limpeza no Seguransa Jardin (FLSJ) no hamoos valeta tanba orsamentu kontijénsia 2020 nian laiha ona atu selu sira.

Adjuntu  Prezidente Autoridade Munisipiu Dili, José Filipe Ximenes Smith hateten, husi tinan 2019 nian Munisipiu hatama orsamentu ho montante  $700.000 ba iha fundus kontijénsia hodi selu maluk sira ne’e atu tau matan ba jardin sira, inklui limpeza jardin no hamoos valeta.

Maibé, nia haktuir, ba 2020 Munisipiu Dili iha rasik ninia planu atu ekstende tan kontratu ho maluk sira ne’e tanba garante ba orsamentu jeral estadu. Agora, tuir nia, realidade OJE 2020 sumba iha Parlamentu Nasionál entaun autoridade Munisipiu Dili labele halo buat ida.

“Ita atu garante saida ba sira. Uluk, ita halo kontratu ho maluk timoroan na’in 140 ne’e tanba orsamentu husi fundus kontijente ne’e iha. Agora orsamentu dudésimu la tama,” José Filipe Ximenes Smith dehan ba Agência TATOLI iha nia knaar fatin Matadoru, Balide, Dili, kuarta (22/1/2020).

Nia hatutan, alternativu ida de’it mak presiza sidadaun hotu iha Kapital Dili ne’e tenke halo mak konsiénsia. Populasaun tenke badinas halo limpeza no labele soe fo’er arbiru atu nune’e labele fó risku ba sidade laran.

“Tan ne’e, favor ida, Munisipiu Dili laiha ona osan atu selu tan sira na’in 140 ne’e maib presizamente mak sidadaun hotu tenke kontribui hodi kombate lixu. Estudante sira, kondutór sira, vendedór sira, ita sira ne’ebé la’o ain kuandu han ka hemu buat ruma karik, favór ida lori plastiku ka Aqua mamuk ba soe iha lixeiru,” nia fó hanoin.

Maske nune’e, nia esplika, Munisipiu Dili tau nafatin konfiansa no halo sensibilizasaun ne’ebé mak halo bebeik ona ba komunidade sira iha ida-idak ninia bairru no suku bele sai referénsia ida atu ema hotu bele kuidadu liután hodi hafurak Dili nu’udar sidade kapitál nasaun ida ne’e nian.

Jornalista : Tomé Amado

Editór      : Rafy Belo

HAKEREK NO HATÁN

Please enter your comment!
Please enter your name here