Prezidente Repúblika, Francisco Guterres Lú Olo. Imajen Tatoli/António Gonçalves

DILI, 22 janeiru 2020 (TATOLI)—Líder partidu tolu kompostu hosi Congresso Nacional de Reconstrução de Timor (CNRT), Kmanek Haburas Unidade Nacional Timor Oan (KHUNTO), União Democrática Timorense (UDT)/Frenti-Mudança, sei hala’o enkontru ho Prezidente Repúblika, Francisco Guterres Lú Olo.

Enkontru ne’ebé sei hala’o iha Palásiu Prezidente Nicolau Lobato, Bairru Pité, Dili, kinta (23/01/2020), ho ajenda prinsipál atu rona partidu polítiku, konfisaun relijioza, sosiedade sivíl, titulár no eis-titulár sira-nia hanoin oinsá atu rezolve impase polítika iha rai-laran.

Ideia enkontru ne’e mosu tanba Prezidente Repúblika haree katak situasaun polítika liuliu proposta Orsamentu Jerál Estadu (OJE) 2020 ne’ebé xumba iha plenária Parlamentu Nasionál, sesta (17/01/2020), implika tebes ba sustentabilidade dezenvolvimentu nasaun. Nune’e, presiza konsentrasaun polítika ida sólida atu bele ultrapasa impase refere.

Ajenda enkontru maka hanesan, ho líder CNRT iha tuku 08h40, fatin Salaun Nicolau Lobato, Prezidensia Repúblika.

Enkontru ho líder partidu KHUNTO iha tuku 11h00, fatin Salaun Nicolau Lobato, Prezidénsia Repúblika.

Enkontru ho líder partidu UDT/Frenti-Mudança iha tuku 14h30, fatin Salaun Nicolau Lobato, Prezidénsia Repúblika.

Jornalista: Cipriano Colo
Editór: Xisto Freitas

HAKEREK NO HATÁN

Please enter your comment!
Please enter your name here