Kursu indusaun iha Institutu Estudu Diplomatiku (IED) iha MNEK. Imajen: Nelia Fernandes

DILI, 22 janeiru 2020 (TATOLI)-Diretór Jerál Asuntu Konsulár Protokolár, Serimoniál no Mídia, Juvêncio de Jesus Martins hateten, agora prepara hela no iha 28 janeiru ne’e Prezidente Repúblika sei fó pose ba embaixadór dezignadu na’in sia.

“Prepara hela ba loron 28 janeiru agora, Prezidente da Repúblika atu halo tomada da posse ba ita-nia embaixadór foun sira ne’e, atu ba país lubuk ida,” dehan Diretór Jerál Asuntu Konsulár Protokolar, Serimoniál no Mídia, Juvêncio de Jesus Martins ba Agência TATOLI iha nia knaar fatin, Avenida Portugal, Dili, ohin.

Diretór jerál ne’e haktuir, iha embaixadór balun seidauk simu pose tanba seidauk simu agreement (konkordánsia). Nia dehan, ba sira seluk ne’ebé seidauk simu agreement ne’e sei hein agreement to’o mai no sira ne’ebé agreement iha ona ne’e bele simu pose iha 28 janeiru oin mai.

Nia esplika, Embaixadór na’in 9 ne’ebé atu simu pose sei dezloka ba rai l’iur sei hala’o nia funsaun hanesan reprezentante nasaun no sei halo promosaun rikusoin Timor-Leste ba rai seluk.

“Ita iha funsaun lima mak embaixadór ida-idak hala’o mak reprezenta ita-nia nasaun iha país ne’ebé nia serbisu ba, halo promosaun ba ita-nia rai, halo promosaun ita-nia rikusoin, halo promosaun ita-nia poténsia ekonomia ne’ebé iha no bele dada investór no negosiasaun ita negósiu iha asuntu bilaterál para bele to’o hetan akordu ruma,” nia dehan.

Nia hatutan, embaixadór sira ne’e sei hala’o knaar bazeia ba buat ne’ebé iha relasaun ho ita-nia rai, para ita bele ba dezenvolve politika bilaterál ne’ebé di’ak hodi bele atinji ita-nia objetivu ne’ebé lori pás, dezenvolvimentu ekonómiku, dezenvolvimentu kultural no sosio-politiku iha mundu tomak.

Ba interrese estadu, nia dehan, interrese estadu mak depende país ida-idak no ita bele define saida mak ita ba halo iha Portugal, saida mak ita ba halo iha Amerika, saida mak ita ba halo iha Japaun, no saida mak ita ba halo iha Austrália.

“Ita tenke ba buka amigu tanba ita-nia konstituisaun dehan katak ita zero inimigo, buka amigu mak barak. Tanba iha mundu ne’e ema hotu hanesan de’it. Ema hotu Maromak tau ho ilas hanesan no buat hotu ita tenke buka amizade ba malu. Iha amizade nia laran mak bele haree interrese,” nia esplika.

Nia haktuir, interrese ne’e mak ita bele fó apoiu ba sira-nia politika ruma mak di’ak ba mundu iha pratika relasaun internasionál ne’ebé ita presiza hodi lori ba ida-idak nia funsaun iha li’ur.

“Ho nune’e mak ita bele kria pás no amizade hodi lori dezenvolvimentu,  ekonómiku, sosio-ekonómiku, politiku ba mundu tomak,” nia dehan.

Entretantu, nia informa, embaixadór dezignadu na’in sia ne’ebe sei simu pose husi Prezidente Repúblika iha 28 janeiru agora mak Embaixadór ba Repúblika Popular Xina, Abrão dos Santos, Embaixadór ba Reinu Unidus, Gil da Costa, Embaixadór ba Cambodia, Ermenegildo ” Kupa” Lopes, Embaixadora ba Portugal, Isabel Amaral Guterres.

Embaixadora ba Australia, Inês Maria de Almeida, Embaixadór ba Japaun, Elídio Ximenes da Costa, Embaixadóra ba Vatikanu, Juvita Rodriques Barreto de Ataide Gonçalves, Embaixadora ba Laos PDR, Maria Renata Caldas de Jesus, Embaixadora ba Singapura, Maria Natália Guterres Viegas Carrascalão.

Entretantu, Embaixadór na’in rua ne’ebé seidauk simu pose, tanba seidauk simu agreement mak hanesan Embaixadora ba Reinu Tailándia, Armandina Maria Gusmão dos Santos no Embaixadór ba Moçambique, Paulo Assis Belo.

Notísia relevante:Embaixadór Dezignadu Na’in 11 Tuir Kursu Indusaun Iha IED

Jornalista : Nelia Fernandes

Editór        : Rafy Belo

HAKEREK NO HATÁN

Please enter your comment!
Please enter your name here