DILI, 21 janeiru 2020 (TATOLI) – Adjuntu Administradór Munisipiu Dili, José Filipe Ximenes “Zeca” Smith hateten, Autoridade Munisípiu Dili orienta ekipa seguransa munsipiu Dili hodi foti asaun hasoru komunidade ne’ebé haki’ak fahi ho kondisaun fahi-luhan la saudavel ne’ebé fó ameasa ba ema seluk nia saúde.
“Medidas ne’ebé mak ami halo ona bazeia ba informasaun husi komunidade nian. Karik, iha viziñu ruma mak haki’ak fahi iha luhan laran ou kesi de’it maibé la kria kondisaun di’ak no fó ameasa ba ema seluk nia vida tenke mai informa,” dehan Adjuntu Administradór Munisípiu Dili, José Filipe Ximenes Smith, ba Agência TATOLI iha nia knaar fatin, Matadoru, Dili, tersa, ohin.
Nia hatutan, medidas ne’ebé mak Munisipiu Dili halo ona mak primeiru halo uluk aprosimasaun direta ba ba fahi na’in durante semana ida, atu nune’e sira bele kria kondisaun di’ak. Maibé, nia dehan, bainhira halo tiha aprosimasaun mak sira la kumpri nafatin mak autoridade iha obrigasaun tenke foti duni animál ne’e.
“Ida ne’e konforme lei tributaria mak dehan. Ami mesak de’it la bele kontrola ba to’o bairu sira ne’e tanba Munisipiu Dili laiha kondisaun ne’ebé sufisiente. Ne’eduni ba maluk sira ne’ebé mak sai vitima ba kestaun ne’e tenke informa,” nia dehan.
Nia hateten, bainhira situasaun hanesan ne’e akontese iha komunidade nia le’et depois la informa entaun Munisipiu Dili mós la hare hetan no sei sei la halo asaun ruma.
“Ha’u husu ba komunidade ne’ebé haki’ak animál tenke kria ninia kondisaun pelumenus halo ninia tanki atu nune’e animál ninia foer sira ne’e fase karik bele tama ba laran. La’os naklekar hela hodi fó fali ameasa ba ema seluk. Ha’u rekuñese katak to’o agora iha Sidade Dili, ema sei kontinua haki’ak fahi ho kondisaun la saudavel,” nia esplika.
Notísia relevante:Komunidade Taibesi Preokupa Ho Fahi Nia Dois
Jornalista : Tomé Amado
Editó : Rafy Belo
Kontrola valeta sira ne’e para hamos bebeik atu nune labele hamosu inundasaun wai hira udan.
Ba kontrola fali dma nia fahi luhan mos iha ne’e