Xefe Departamentu Rejistu Veíkulu DNTT, Nelson Martins. Imajen/Tatoli Egas Cristovão.

DILI, 21 janeiru 2020 (TATOLI) – Xefe Departamentu Rejistu Veíkulu, Diresaun Nasionál Transporte Terrestre (DNTT), Nelson Sequeira Martins, husu ba motorista no kondutór sira katak bainhira viajen labele simu telefone hosi ema tanba fó perigu ba vida umana.

“Ita halo viajen ruma karik, proibe ko’alia ho telefone bainhira iha kondisaun lori karreta no motór tanba bele afeta ba ita-nian vida, maibé atu simu telefone tenke para uitoan maka foin la’o fali tanba buat ida asidente ita la hatene, maibé ita maka tenke kuidadu an ita-nia vida, basá ita-nia vida folin boot liu buat hotu-hotu”, nia dehan ba TATOLI iha Balidi, ohin.

Tanba ne’e maka DNTT kontinua fó hanoin ba utilizadór veíkulu atu hatudu konxiénsia no tau importánsia ba kestaun sira ne’e, nune’e prevene asidente bainhira halo viajen.

“Ita tenke konxiente katak bainhira halo viajen ka tula ema ruma, seguransa moris importante no tenke kumpre lei kódigu estrada bainhira ita halo viajen”, akresenta.

Nune’e mós, DNTT husu nafatin motorista sira atu respeita lei kódigu estrada bainhira kondús viatura, nune’e bele prevene asidente tráfegu.

“DNTT kontinua husu ba motorista sira atu kondús karreta ka motór tenke kuidadu tuir velosidade ne’ebé maka iha ona lei kódigu estrada númeru 5/2003, nune’e ita prevene asidente sira tanba agora ita rona asidente barak iha fatin-fatin”, katak.

Jornalista : Natalino Costa 

Editora : Maria Auxiliadora

HAKEREK NO HATÁN

Please enter your comment!
Please enter your name here