Foto Espesial

DILI, 20 janeiru 2020 (TATOLI)-Xefe Sentru Saúde Becora, Adelina Pinto hateten, Sentru Saúde Becora durante ne’e menus bee-moos maibé  dala barak sira kuru bee-moos husi ka iha komunidade ne’ebé nia uma besik sentru saúde ne’e.

“Dala barak ami kuru bee-moos, ami-nia pesoál sira uza ami-nia multi funsaun kuru komunidade-nia fatin ka ba kuru iha fasilidade jeral sira ne’ebé iha bee mós. Ami kuru lori mai ense tanque para ami uza,” Xefe Sentru Saúde Becora, Adelina Pinto, dehan ba Agência TATOLI iha nia kna’ar fatin, segunda (20/01/2020).

Nia informa, meius seluk ne’ebé sira halo mak esforsu an koordena ho Munisipiu Dili, atu nune’e bele ajuda oferese bee-moos ba Sentru Saúde Becora.

“Ami koordena nafatin ho ami-nia Munisipal Dili ba iha Administradór Munisipiu Dili husi SAS ninian, sira mai ense iha ne’e semana ida ense dala ida,” nia infrima.

Nia hatutan, bee-moos ne’ebé SAS oferese ne’ebé mak sira utiliza maibé bee ne’e ninia volume kiikoan liu. Bee mai de’it oras rua entaun tanke la nakonu signifika la sufisiente. Tanba ne’e, nia dehan, sira sempre kuru bee-moos iha komunidade nia uman  para hodi bele utiliza.

“Bee-moos ne’ebé utiliza iha fasilidade saúde ne’e menus tebes. Tanba, atendimentu ba populasaun liuliu iha maternidade no emergência 24 horas menus liu bee-moos. Tanba, inan barak mak mai tu’ur ahi iha fatin ne’e. Ida ne’e mak bee nia debet la sufisiente ba ami utiliza durante tinan tomak to’o mai agora,” dehan Adelina Pinto.

Iha parte seluk, Xefe Sentru Saúde Becora, Adelina Pinto, informa liga ho ai-moruk sufisiente maibé iha difikuldade uitoan ba iha materiál hanesan aparellu tensaun ne’ebé atu koko inan-isin rua sira.

“Iha aparellu tensaun ida rua de’it mak iha ami-nia fatin, maibé  ita uza loro-loron ne’e sempre hanesan buat ida aat lalais. Agora daudauk ami uza hamutuk ho maternidade no emerjênsia uza ida de’it iha inan isin rua ni’an, ami impresta no uza hamutuk,” nia dehan.

Ho fasilidade ne’ebé menus, nia hatutan, lai empata sira-nia espiritu atu atende pasiente sira ho domin  maske iha limitasaun ba fasilidade saúde nian.

Entretantu, nia informa, durante ne’e  inan isin-rua sira ne’ebé mak partus  iha Sentru Saúde Becora, mínimu liu fulan ida ema 75 no másimu liu to’o ema 100 resin kada fulan.

“Ba partu normál ne’e mínimu ema 75 no másinu ne’e hamutuk ema na’in 115,125. Ba inan ida ne’ebé mai observa ameasa abortu no inan isin-rua balun ne’ebé mai ho kondisaun grave, ami tenke transfere ba Hospital Nasional Guido Valadares (HNGV),” nia esplika. .

Jornalista : Nelia Fernandes

Editór       : Rafy Belo

HAKEREK NO HATÁN

Please enter your comment!
Please enter your name here