Luis Roberto, Deputadu Bankada KHUNTO

DILI, 21 janeiru 2020 (TATOLI)—Segundu Vise-Prezidente Parlamentu Nasionál, Luís Roberto, hateten to’o oras ne’e Aliansa Mudansa ba Progresu (AMP) seidauk iha komunikasaun atu tuur hamutuk.

Partidu tolu iha AMP ne’ebé forma VIII Governu Konstitusionál mak hanesan CNRT, PLP no KHUNTO.

“Buat polítika ne’e la’ós akontesimentu ida, ne’ebé ohin tuur hamutuk kedas. Buat ne’e ita sei haree tempu. Ha’u haree bankada Parlamentár hosi Governu nian no deputadu sira komunikasaun la’o di’ak hela. Soké seidauk iha ajenda atu tuur hamutuk filafali”, Deputadu Luís Roberto, informa ba jornalista, iha resintu Parlamentu Nasionál, tersa ne’e.

Nia konsidera informasaun ne’ebé Primeiru-Ministru fó-sai iha mídia dehan AMP la eziste ne’e kualidade hanesan Primeiru-Ministru, la ko’alia nu’udar prezidente partidu polítiku.

“Normalmente sira-nia proposta orsamentu mai iha kuandu sumba, Primeiru-Ministru iha direitu ko’alia. Ba ha’u-nia haree Governu seidauk monu. Primeiru-Ministru ko’alia hanesan kualidade Primeiru-Ministru, tanba ita konsidera orsamentu raan Estadu nian, lori mai Parlamentu sumba, nu’udar Primeiru-Ministru iha razaun ko’alia ida-ne’e”, nia subliña.

Deputadu ne’e konsidera katak AMP sei eziste hela ka la fahe malu.

“Ami partidu tolu ne’ebé hamutuk iha AMP sei eziste nafatin. Seidauk iha partidu polítiku ida deklara dada-an hosi bloku AMP. Ami la hadook malu. Ha’u fiar katak ami sei tuur hamutuk iha tempu badak”, Deputadu KHUNTO ne’e hateten

Purtantu, Vise-Xefe Bankada CNRT, Patrocínio Fernandes, hateten de’it “ha’u seidauk bele ko’alia”.

Jornalista: Evaristo Soares Martins

Editór: Xisto Freitas

HAKEREK NO HATÁN

Please enter your comment!
Please enter your name here