DILI, 21 janeiru 2020 (TATOLI) – Vise-Reitór UNDIL Trata Asuntu Akadémiku, Francisco Mausoro Martins hateten, rejime duodésimu ne’e hamosu dezafiu barak iha universidade nia laran mak estudante Universidade Dili (UNDIL) kuaze 60% to’o agora seidauk kumpre sira-nia obrigasaun hodi selu propina eskola nian.

Nia hatutan, maske situasaun politika ne’ebé akontese afeta ba ekonomia hodi implika ba estudante sira maibé universidade nafatin fó oportunidade ba estudante sira ne’e atu kontinua sira nia estudu atu  labele para iha dalan klaran.

“Ita hatene situasaun politiku ne’ebé akontese afeta ba ekonomia rai laran entaun implika mós ba inan aman sira inklui ba Universidade Dili (UNDIL). Tanba, nu’udar Instituisuan Ensinu Superiór Privadu durante ne’e dependénsia ba estudante sira. Agora familia estudante sira mak hetan susar konserteza universidade mós susar,” dehan  Vice Reitór UNDIL Trata Asuntu Akadémiku, Francisco Mausoro Martins, ba Agência TATOLI iha Kampus UNDIL, Mascarenhas, tersa (21/1/2020).

Nia hateten, rejime duadésimu ne’e hamosu dezafiu barak iha Universidade nia laran, tanba programa no atividade ne’e ninia implikasaun mai husi orsamentu estudante sira-nian, diferensa ho Universidade Nasional Timor-Lorosa’e (UNTL) ne’ebé ninia orsamentu rasik preve iha OJE.

Agora, nia haktuir, orsamentu duodésimu ne’e funsiona de’it  ba mákina estadu nian. Nia dehan, UNDIL ninia estudante sira barak liu mak mai husi familia ne’ebé dependénsia ba vida agrikultór to’os no natar.

“Agora osan la sulin tun ba komunidade iha kra’ik oinsá mak inan-aman sira bele apoiu oan sira atu mai eskola,” nia dehan.

Nia haklaken, maske UNDIL nu’udar instituisaun ensinu superiór privadu maibé la’os osan mak sai trajetu maibé rekursu umanu mak importante. Tanba ne’e, universidade tenke komprende no loke ninia an no konsellu reitór foti ona desizaun katak estudante ne’ebé mak labele selu ninia propina tanba situasaun ekonomia tenke fó hatene ba Universidade atu bele buka solusaun.

“Ita lakohi hamate atividade universidade nian no ita mós lakohi estudante sira hapara sira-nia estudu. Tan ita konsidera dezafiu ida ne’e hodi fó liman ba malu. Dutrina UNDIL nian mak edukadór sira tenke hamutuk ho estudante sira atu alkansa objetivu edukasaun nian to’o ramata,” nia hateten.

Jornalista : Tomé Amado

Editór      : Rafy Belo

HAKEREK NO HATÁN

Please enter your comment!
Please enter your name here