Primeiru-Ministru Taur Matan Ruak hamutuk ho membru Governu sira iha Palásiu Governu, Dili, Tersa (21/01/2020). Imajen/TATOLI Egas Cristovao.

DILI, 21 janeiru 2020 (TATOLI) – Primeiru-Ministru (PM), Taur Matan Ruak, ohin, konvoka reuniaun ho membru Governu sira hodi informa asuntu importante tolu. Pontu tolu ne’e maka, prosesu hirak maka liu to’o mai agora, situasaun atuál, no oinsá la’o bá oin.

“Liafuan xave ne’ebé iha reuniaun ne’e maka públiku presiza hatene Governu kontinua funsiona normál, no husu ba membru Governu hotu hala’o servisu hanesan baibain no orienta funsionáriu sira atu fó atendimentu bain-bain ba populasaun to’o Governu foun mai asume fali responsabilidade”, Sekretáriu Estadu Komunikasaun Sosiál (SEKOMS), Merício Juvinal dos Reis ‘Akara’, informa hafoin partisipa soru-mutu ho PM iha Palásiu Governu, ohin.

Governante ne’e hatutan, Xefe Ezekutivu mós husu ba populasaun hotu atu hakmatek nafatin akompaña prosesu no fó tempu ba lider sira atu buka solusaun ba situasaun daudaun ne’e.

“Primeiru-Ministru nia serbisu hanesan baibain, husu atu akompaña nafatin atividade Xefe Governu nian, membru Governu hothotu”, dehan.

Iha parte seluk, SEKOMS hatete sobre utilizasaun rejime doudesimál ne’e normál tanba kondisaun maka hanesan ne’e.

“Tanba ita-nia orsamentu 2020 la pasa maka automatikamente ita utiliza doudesimál, iha limitasaun ne’ebé membru Governu hotu iha orientasaun atu jere ho di’ak, no fó atendimentu baibain bazeia ba orsamentu doudesimál hodi hein Orsamentu Jerál Estadu”, afirma.

Enkontru entre PM ho elenku governante sira ne’e hahú iha tuku 9 dadeer no remata iha tuku 11.

Jornalista : Antónia Gusmão

Editora : Maria Auxiliadora

HAKEREK NO HATÁN

Please enter your comment!
Please enter your name here