Sesaun plenária Parlamentu Nasionál. Imajen/TATOLI

DILI, 21 janeiru 2020 (TATOLI)—Orsamentu duodésimu ne’ebé Ministériu Finansa (MF) prevee ba Parlamentu Nasionál (PN) hamutuk $1,241,928.

Hosi totál orsamentu $1,241,928 kompostu hosi saláriu no vensimentu $484,484, bens no serbisu $662,527, transferénsia públika $78,667 no kapitál dezenvolvimentu $16,250.

“Orsamentu duodésimu, ami simu ona pakote hosi Ministériu Finansa ho totál $1,241,928, ne’ebé fahe ba kategoria tolu. Primeiru ba saláriu no vensimentu, bens no serbisu, transferénsia públika ne’e fahe ba bankada Parlamentár sira no kapitál dezenvovimentu, maibé kapitál menór zero”, Sekretária Jerál Parlamentu Nasionál, Cedelizia Faria dos Santos, ba Agência TATOLI, iha nia knaar-fatin, Sekretariadu PN, tersa ne’e.

Nia esplika, transferénsia públika Parlamentu Nasionál nian sei fó ba bankada Parlamentár sira hodi bele hala’o atividade bankada idak-idak nian iha fulan-janeiru nia laran.

“Hosi bens no serbisu ne’e inklui mós viajen lokál no viajen estranjeiru. Orsamentu ne’e ba fulan-janeiru nian. Ne’e ba funsionamentu Parlamentu Nasionál nian, karik ita halo viajen lokál ruma no ita halo transferénsia”, Cedelizia hateten.

Hosi totál orsamentu $1,241,928 ne’e, Parlamentu Nasionál hetan $540,227, Gabinete Prezidente Parlamentu hetan $51,864, Bankada Parlamentár sira hetan $78,667.

Hosi orsamentu $78,667 koloka ba Bankada Parlamentár FRETILIN, CNRT, PLP, PD, KHUNTO, UDT/FM no PUDD.

Purtantu, Komisaun Espesializada sira mak hanesan Komisaun A (trata asuntu Justisa no Konstitusionál) hetan $12,913, Komisaun B (Negósiu Estranjeiru, Defeza no Seguransa) hetan $13,799, Komisaun C (Finansa Públika) hetan $15,153, Komisaun D (Ekonomia no Dezenvolvimentu hetan $11,108.

Nune’e mós, Komisaun E (Infraestrutura) hetan $15,172, Komisaun F (Saúde, Seguransa Sosiál no Igualdade Jéneru) hetan $12,606 no Komisaun G (Edukasaun, Juventude, Kultura no Sidadania hetan $15,248.

Hosi parte Konsellu Fiskalizasaun Sistema Nasionál Intelijénsia Timor-Leste hetan $5,791, Grupu Feto Parlamentár Timor-Leste hetan $3,912, Gabinete Sekretáriu-Jerál Parlamentu hetan $7,394, Gabinete Auditoria Interna $4,429, Diresaun Jestaun Finanseira $133,599, Diresaun Rekursu Umanu no Formasaun hetan $256,689, Diresaun Apoiu Parlamentár $9,757.00, Diresaun Komunikasaun $17,149.

Nune’e mós ba Divizaun Planeamentu, Monitorizasaun no Avaliasaun hetan $1,192, Divizaun Protokolu hetan $1,910, Organizasaun Globál Parlamentár Kontra Korrupsaun hetan $7,725, Sentru Promosaun Igualdade Jéneru hetan $1,717, Gabinete Estudu Estratéjiku no Jurídiku hetan $2,004, Gabinete Relasaun Internasionál no Kooperasaun hetan $727,000 no Konsellu Konsultivu Fundu Petrolíferu hetan $21,178.

Jornalista: Evaristo Soares Martins

Editór: Xisto Freitas

HAKEREK NO HATÁN

Please enter your comment!
Please enter your name here