Ministra Finansa ein ezersísiu, Sara Lobo Brites. Imajen Tatoli/ Egas Cristovão.

DILI, 21 janeiru 2020 (TATOLI) – Ministra Finansa (MF) ein funsaun, Sara Lobo Brites, informa sei fó sai progresu ezekusaun ba dotasaun orsamentu temporáriu (DOT) hafoin janeiru ne’e remata.

“Fulan remata lai maka ha’u ko’alia, ohin, maka foin selu funsionáriu sira, ne’ebé fulan ne’e hotu no ha’u haree lai dadus maka informa”, Sara Lobo Brites ba TATOLI iha Palásiu Governu, ohin.

Konsellu Ministru aprova ona rejime doudesimál janeiru 2020 ho valór millaun $116,4 ne’ebé  hafahe ba ketegoria sira hanesan saláriu no vensimentu hamutuk millaun $17,8, bens no servisu millaun $38,6, transferénsia públika millaun $26,6, no kapitál dezenvolvimentu millaun $33,4 no kapitál menór suspende tanba relativa ho prosesu aprovizionamentu.

Ezekusaun orsamentu iha fulan ne’e hahú bainhira Konsellu Ministru iha 13 janeiru aprova dekretu ezekusaun no iha loron ne’e kedan MF distribui DOT ba liña ministeriál no instituisaun Estadu sira.

Dekretu Governu ne’e aprezenta hosi Ministra Finansa ein funsaun, Sara Lobo Brites, ba orsamentu doudésimu sura hosi prosesu aprovasaun proposta lei ba Orsamentu Jerál Estadu (OJE) ba tinan 2020 seidauk konklui no la tama vigór iha 1 janeiru 2020.

Dekretu Governu ida ne’e mai aprova ho abrigu lei númeru 13/2019, altera hosi lei númeru 9/2011 no 3/2013, konjuntu hosi norma ne’e atu disiplina aplika rejime doudesimál.

Diploma ida ne’e, hahú iha 1 janeiru 2020 no remata automatikamente bainhira OJE ba 2020 tama iha vigor.

Regra no prosedimentu aplikasaun rejime duodésimu, instituisaun Estadu hotu presiza prepara DOT bazeia ba prinsípiu rua mak hanesan; dotasaun orsamentál kobre de’it despeza ida durante períodu la liu fulan ida no dotasaun orsamentál labele liu um doze avos (1/12) husi orsamentál ne’ebé define tiha ona tuir lei orsamentál jerál Estadu númeru 13/2016.

Notísia relevante : MF Distribui ona DOT Janeiru 2020

Jornalista : Antónia Gusmão

Editora : Maria Auxiliadora

 

HAKEREK NO HATÁN

Please enter your comment!
Please enter your name here