Sesaun plenária Parlamentu Nasionál. Imajen/TATOLI

DILI, 21 janeiru (TATOLI)—Hafoin proposta Orsamentu Jerál Estadu (OJE) 2020 sumba, loron rua ona (segunda-tersa semana ne’e) Parlamentu Nasionál (PN) laiha ajenda plenária.

Molok proposta lei orsamentu sumba, Parlamentu Nasionál (PN) sempre iha ajenda plenária iha loron segunda no tersa, maibé hahú hosi horisehik to’o ohin tersa, seidauk iha plenária.

Segundu Vise-Prezidente Parlamentu Nasionál, Luís Roberto, hateten ajenda ba plenária sempre deside no aprova giaun hosi líder bankada sira, maibé to’o oras ne’e seidauk.

“Normalmente ita iha plenária ne’e segunda no tersa, maibé relasiona proposta orsamentu sumba iha Parlamentu, ita haree ba ida-ne’e mak Parlamentu sei hein no haree situasaun maibé funionamentu Parlamentu la’o fatin hanesan normál. Ami iha ona hanoin atu konvoka reuniaun líder bankada sira hodi tau ba ajenda para plenária bele la’o hanesan baibain”, Deputadu Luís Roberto, informa ba jornalista sira, iha resintu Parlamentu Nasionál, tersa ne’e.

Nia dehan, horisehik no ohin laiha pelnária tanba seidauk konvoka reuniuan entre líder bankada sira.

“Funsionamentu Parlamentu Nasionál nian la’o nafatin. Meza Parlamentu sei konvoka enkontru ho líder bankada sira hotu-hotu tau ajenda para hodi hala’o plenária. Ha’u hanoin iha kinta ka sesta ami sei tuur hamutuk liuhosi líder bankada”, nia informa.

Purtantu, Vise-Xefe Bankada Parlamentár FRETILIN, Francisco Miranda Branco hateten oras ne’e Parlamentu Nasionál funsiona hela.

“Funsionamentu normál hanesan mós ho Governu funsiona normál”, nia dehan iha Parlamentu Nasionál.

Tuir observasaun Agência TATOLI, durante loron rua ona laiha ajenda ba plenária, maibé deputadu sira idak-idak hala’o servisu iha bankada.

Nune’e mós, funsionáriu sira hala’o servisu normál hahú hosi meza Parlamentu, sekretariadu, komisaun espesializa sira no bankada Parlamentár sira hala’o serbisu hanesan normál.

Jornalista: Evaristo Soares Martins

Editór: Xisto Freitas

HAKEREK NO HATÁN

Please enter your comment!
Please enter your name here