Prezidente CDN-CNRT atuál Ministru Negósiu Estranjeiru no Kooperasaun, Dionísio da Costa Babo. Imajen/ Tatoli Egas Cristóvão

DILI, 21 janeiru 2020 (TATOLI)–Prezidente Konsellu Diretivu Nasionál (CDN-sigla portugés), Dionísio da Costa Babo Soares, informa hafoin Proposta Orsamentu Jerál Estadu (OJE) 2020 la pasa iha diskusaun jeneralidade, kuadru Partidu Congresso Nacional de Reconstrução de Timor (CNRT), ne’ebé hamutuk iha koligasaun Aliansa Mudansa ba Progresu (AMP)  seidauk realiza reuniaun ruma.

“Hanesan kuadru CNRT nian, ida-ne’e desizaun ne’ebé foti ona no CNRT seidauk reuni. Klaru sei tuir prosedimentu normál estatutu partidu nian”, nia tenik iha Palásiu Governu, tersa ne’e.

Nia haktuir liafuan ne’ebé antes ne’e Primeiru-Ministru, Taur Matan Ruak hateten katak labele hakfodak ho prosesu polítiku sira tanba situasaun impase ida agora kuaze akontese iha nasaun sira.

“Ida-ne’e iha atmosfera Konstitusionál nasaun hotu-hotu iha mundu akontese maibé importante mak nasaun labele monu no aat. Ita tuir nafatin mekanizmu Konstitusionál ne’ebé iha no entrega ba Prezidente Repúblika atu deside”, nia akresenta.

Dionísio dehan, iha parte AMP ne’ebé hamosu hosi koligasaun CNRT, PLP no KHUNTO, ida-idak sei halo reuniaun iha nível partidu nian atu deside no foti medida saida mak ba oin.

O que certo mak partidu hotu, liuliu CNRT hanoin di’ak ba nasaun ida-ne’e no laiha partidu ida mak hanoin aat ba nasaun ida-ne’e. Maski líder sira iha diferensia ideia maibé sira iha hanoin di’ak no sei ko’alia atu buka medida ka solusaun”, nia subliña.

Atuál Ministru Negósiu Estranjeiru no Kooperasaun ne’e konsidera mudansa Governu hanesan  prosesu normál ida no iha parámetru konstitusionál ne’ebé nasaun ida tenke tenki prosede.

“Maski ita rona komentadór sira ko’alia barak maibé ita tenki la’o nafatin tuir mekanizmu Konstitusionál ne’ebé iha”, nia salienta.

Nia konsidera, deklarasaun Primeiru-Ministru ne’ebé iha koligasaun hanesan Portavóz AMP, ko’alia tanba bazeia ba desizaun hosi Parlamentu Nasionál ne’ebé la aprova Proposta OJE 2020, maibé hanesan Governu tenke la’o to’o Governu foun mosu.

“Kona-ba desizaun Prezidente Partidu no Sekretáriu Jerál mak hanesan membru Komisaun Polítika nasionál (CPN-sigla portugés) mak deside. Ha’u hanesan parte hosi Konsellu Diretiva Nasionál hanesan fó opiniaun de’it”, nia esplika.

Jornalista: Julia Chatarina

Editór: Xisto Freitas

HAKEREK NO HATÁN

Please enter your comment!
Please enter your name here