Komandante PNTL Munisipiu Liquica Interino Superintendente Asistente, Luis da Silva. Imajen/Egas Cristovão

DILI, 21 janeiru 2020 (TATOLI)-Komandu Polisia Nasionál Timor-Leste (PNTL), Munisipiu Liquiça halo ona investigasaun ba kazu ema deskoñesidu oho ferik ida iha área Suku Lauhata, Postu Administrativu Bazartete, Munisipiu Liquiça.

Komandante Interinu Polisia Munisipiu Liquiça, Superintendente Polisia, Luis da Silva, informa katak, kronolojia kazu ne’e akontese iha sesta (17/01/2020), purvolta tuku 22:00 Otl.

Bazeia ba investigasaun ne’ebé polisia halo katak, vítima Martinha dos Santos (33) hetan oho husi ema deskoñesidu iha uma laran ne’ebé dook husi vila Suku Lauhata, kuaze kilu metru 5 sa’e ba foho leten.

Vítima mate, hafoin ema deskoñesidu lori katana ta iha kakorok, ain no liman, rezulta raan sai makas too mate fatin.

Matebian nia isin mate iha momentu ne’ebá, polisia lori kedas ba Ospitál Nasionál Guido Valadares (HNGV) Dili hodi halo autópsia no mate isin entrega kedas ba família hodi hala’o serimónia funerál iha nia moris fatin Lauhata-Liquiça.

Mezmu mate isin família sira halot ona, maibé parte PNTL sei halo hela investigasaun hodi buka tuir informasaun husi família vítima no sasin balun koñese di’ak vítima.

“Ami deskonfia ema deskoñesidu sira mak oho mate vítima Martinha dos Santos, tanba iha fatin akontesimentu ita haree raan barak maka fakar husi kuartu laran sai too dapur laran,” dehan Komandante Polisia Luis ba jornalista, ohin, via  telefone.

Bazeia ba informasaun ne’ebé polisia rekolla husi sasin balun katak, antes mate, vítima haksesuk malu ho família balun tanba problema hadau malu rai nu’udar vítima nia toos fatin.

Parte polisia Liquiça halo ona koordenasaun ho autoridade suku, Ofisiál Polisia Suku (OPS), membru Konsellu Polisiamentu Komunitáriu (KPK) hodi buka tuir paradeiru husi autór sira ne’ebé deskonfia oho  vítima.

Jornalista : Eugénio Pereira

Editór       : Francisco Simões

HAKEREK NO HATÁN

Please enter your comment!
Please enter your name here