Jogadór no estrutura Lalenok United FC festeja vitória ne'ebé sira hetan iha Primeira Divizaun LFA époka 2019. Imajen Mídia LFA

DILI, 21 janeiru 2020 (TATOLI)–Lalenok United FC hanesan klube foun ne’ebé foin harii iha 2016 hodi partisipa iha Liga Futeból Amadora (LFA) maibé liu de’it tinan tolu resin ekipa refere konsege hamorin Timor Leste nia naran tanba hola parte iha jogu Playoff Tasa Asian Football Confederation (AFC-termu Ingléz) 2020.

Antes ne’e, dentru tinan tolu nia laran, klube refere konsege ultrapasa hosi Terseira Divizaun ba Segunda Divizaun no hakat kedas ba Primeira Divizaun LFA hodi foti títulu tolu iha tinan ida nia laran.

Iha jogu Playoff, Lalenok sei hasoru klube zigante Indonézia nian, Persatuan Sepak Bola Makassar ne’ebé koñesidu PSM Makassar, iha Estádiu Kapten I Wayan Dipta, Bali, 22 janeiru 2020.

Treinadór Lalenok FC, Yance Matmei hateten kondisaun jogadór Lalenok maioria di’ak. Tanba ne’e, sira prontu ona atu joga hasoru klube Indonezia PSM Makasar.

“Preparasaun jogadór la’o kapa’as loos. Ami prontu hatudu rezultadu ne’ebé di’ak hodi hamorin Timor-Leste nia naran. Tékniku ami-nian másimu ona. Estratéjia jogu mós di’ak ona,” Yance ba Agência Tatoli via email, tersa ne’e.

Nia dehan, nia koñese no hatene estratéjia no tátika treinadór klube PSM nian ne’ebé la diferente ho saida mak nia fó ba jogadór Lalenok.

“Sira-nia estratéjia ka xave mak ne’e, jogadór maioria ho postura di’ak. Maibé, ha’u fiar jogadór Lalenok mós di’ak. Ha’u konfia iha ha’u-nia jogadór sira. Ha’u fiar ami sei hatudu rezultadu pozitivu. Ami sei lori rezultadu di’ak ba Timor-Leste,” treinadór nasionalidade Indonézia ne’e tenik.

Nia hatutan, durante Liga Futeból Amadora (LFA) la’o halo jogadór timoroan barak nia mentál di’ak. Nune’e, Lalenok joga hasoru PSM nia fiar sei manán.

Jogadór Lalenok maioria timoroan, Amérika Latina na’in-ida no Áfrika na’in-rua.

Entretantu, treinadór ekipa refere hamutuk na’in-rua. Ida, treinadór ba baliza no ida seluk treinadór prinsipál. Sira na’in-rua nasionalidade Indonézia.

Jornalista: Hortençio Sanchez

Editór: Xisto Freitas

HAKEREK NO HATÁN

Please enter your comment!
Please enter your name here