Koordenadora Interina ba Reforma Lejizlativa MRLAP, Melisa Silva Caldas. Imajen/Egas Cristovão

DILI, 20 janeiru 2020 (TATOLI)–Iha tinan 2020, Governu liuhosi Ministériu Reforma Lejizlativa no Asuntu Parlamentár (MRLAP) sei serbisu hamutuk Ministériu Finansa (MF) no ministériu relevante seluk atu hadi’a Lei Aprovizionamentu.

Portavóz MRLAP no Koordenadora Interina ba Reforma Lejizlativa, Melisa Silva Caldas, hateten durante ne’e Lei aprovizionamentu sai kestaun boot ba MRLAP no mós ministériu seluk.

“Lei Aprovizionamentu ita tenke analiza filafali rejime jurídiku aprovizionamentu ne’ebé sofre alterasaun balun durante tinan hirak nia laran. Ita haree ba rejime lei ne’e no haree ba nesesidade husi ministériu sira ida-idak, liuliu kona-ba kestaun aprovizionamentu nia aplikasaun ne’e oinsá”, nia tenik ba Agência TATOLI iha Palásiu Governu, segunda ne’e.

Tuir Koordenadora Internina ne’e, iha parte balun husi Lei Aprovizionamentu mak durante ne’e difikulta instituisaun Estadu sira atu hala’o aprovizionamentu.

“Entaun, oinsá mak ita hakat husi difikuldade sira-ne’e, iha hanoin ida hosi Ministériu Defeza, ne’ebé konsidera aprovizionamentu ba defeza ne’e la hanesan aprovizionamentu seluk. Entaun, duké ita halo tan lei ida, oinsá mak ita bele book iha rejime jurídiku aprovizionamentu hodi bele prevee espesidade ba kada ministrériu”, nia akresenta.

Nia dehan ezemplu konkretu aprovizionamentu Ministériu Defeza la hanesan ministériu seluk, mak bainhira ministériu iha planu atu sosa kilat musan ne’e iha ninia espesidade seluk.

“Entaun, oinsá mak ita bele hadi’a rejime jurídiku jerál hodi prevee espesidade ba kada área ninian”, Melisa subliña.

Aleinde hadi’a Lei Aprovizionamentu, ba tinan 2020 lei ne’ebé MRLAP hanoin atu haree mak Rejime Jerál Taxa, Rejime Jerál Kontra Ordenasaun no Lei Enkuadramentu Orsamentál.

“Ida-ne’e iha parte ida hosi reforma ekonómiku no finanseira”, nia salienta.

Jornalista: Julia Chatarina

Editór: Xisto Freitas

HAKEREK NO HATÁN

Please enter your comment!
Please enter your name here