Deputadu Bankada PD, Mariano Assanami Sabino. Imajen Tatoli/Egas Cristóvão

DILI, 20 janeiru 2020 (TATOLI)—Deputadu Bankada Partidu Demokrátiku (PD), Mariano Assanami Sabino, hateten situasaun polítika atuál iha rai-laran hametin sistema polítiku repúblika semi prezidensialista.

Assanami ko’alia asuntu ne’e relasiona ho proposta Orsamentu Jerál Estadu (OJE) la pasa iha debate faze jeneralidade iha Parlamentu Nasionál, foin lalais.

Deputadu Bankada Demokrátiku ne’e afirma, ne’e teste ba multipartidária no teste sistema ne’ebé Timor-Leste opta. Se Timor-Leste hanesan modelu prezidensialista ne’e karik, prezidente mak hili ninia ema sira mai tuur no nia la’o daudaun ona.

“Maibé ita ho sistema semi prezidensialista, partidu sira mak buka malu atu entende malu depois bele fó garantia ba governasaun. Konsekuénsia ida-ne’e parte ida mós para hametin liután ita-nia sistema. Ne’ebé, ita labele laran taridu maibé responsabilidade polítika sira tenke boot liu, partidu sira tenke boot liu para aposta ba saida maka interese Estadu iha situasaun ida-ne’e”, nia dehan iha resintu Parlamentu Nasionál, segunda ne’e.

Assanami subliña, Prezidente Repúblika presiza ativu liu para bolu polítiku sira oinsá iha solusaun ba situasaun ne’e.

“PD husu maun sira tenke buka malu liuhosi dalan hotu-hotu. Labele husik ita-nia nasaun iha situasaun ida-ne’ebé ke difísil tanba ita haree katak kampu serbisu laiha, joven barak tenke ba buka serbisu iha ema-nia rai. Situasaun difísl liu mak ita-nia ekonomia la’o ladi’ak. Empreza barak taka ninia kompañia. Labele husik ita-nia nasaun iha inserteza”, Assanami fó hanoin.

Nia hatutan, votu ne’ebé povu fó ne’e tenke nakfilak ba responsabilidade, prinsípiu ba konstrusaun Estadu no oinsá mak nasaun ne’e metin tanba Timor-Leste lidera nasaun ne’ebé ke frájil, maibé Timor-Leste labele hatudu liu iha frájil.

Repúblika Semi Prezidensialista

Xefe Estadu mak Prezidente Repúblika, ne’ebé eleitu ho sufrájiu diretu no universál ho mandatu ba tinan lima. Prezidente Repúblika maka hanesan garante ba Konstituisaun, unidade Estadu no funsionamentu regulár instituisaun demokrátika nian, nia mak bele promulga diploma lejizlativa ne’ebé Governu aprova ona ka Parlamentu Nasionál no bele mós ezerse direitu veto. Prezidente Repúblika mak hanesan Komandante Supremu Forsa Armada.

Halo tiha eleisaun ba Parlamentu Nasionál, Prezidente Repúblika konvida líder partidu ne’ebé hetan votu barak liu ka hosi aliansa partidu sira ho maioria Parlamentár atu forma Governu. Kompete mós ba Prezidente-Repúblika atu prezide Konsellu Estadu no Konsellu Superiór Defeza no Seguransa.

Purtantu, Parlamentu Nasionál, órgaun lejizlativu, fiskalizasaun no desizaun polítika, kompostu hosi mínimu deputadu sira na’in-52 no másimu 65, no hili sira liuhosi votu populár ho mandatu ba tinan 5. Lei Eleitorál mak bele estabelese númeru loloos deputadu sira ne’ebé kompoin Parlamentu Nasionál, agora nian mak 65. Partidu polítiku sira konkorre iha eleisaun lejizlativa, ne’ebé organiza tuir lista ordenada kandidatu sira-nian.

Governu, ne’ebé bele halo mós lei sira, hanesan dekretu-lei, kona-ba matéria balun, mak sai nu’udar órgaun ezekutivu Estadu nian no órgaun Superiór Administrasaun Públika, responsável mós ba elaborasaun no implementasaun programa Governu, ne’ebé kontein polítika jerál paíz nian, ba tinan lejizlatura tinan 5 laran. Entretantu, Primeiru-Ministru mak Xefe Governu.

Jornalista: Evaristo Soares Martins

Editór: Xisto Freitas

HAKEREK NO HATÁN

Please enter your comment!
Please enter your name here