Primeiru-Ministru, Taur Matan Ruak, Prezide Reuniaun Konsellu Ministru iha Palásiu Governu, Dili, Kuarta (18/12/2019). Imajen/TATOLI Egas Cristovao

DILI, 20 janeiru 2020 (TATOLI)–Governu liuhusi Ministériu Reforma Lejizlativa no Asuntu Parlamentár (MRLAP) iha ona inisiativa atu ajusta Lei Pensaun Vitalísia ba eis-deputadu no eis-titulár husi kargu públiku sira hodi ajusta ba Lei Seguransa Sosiál.

Ba inisiativa ida-ne’e, Portavóz MRLAP no Koordenadora Interina ba Reforma Lejizlativa, Melisa Silva Caldas, informa parte MRLAP antes ne’e hatama ona estudu kona-ba proposta lei ba Prezidénsia Konsellu Ministru (PCM-sigla portugés) iha juñu, hafoin proposta lei ne’e submete fali iha outubru.

“Proposta lei kona-ba Rejime Jurídiku Seguransa Sosiál ba titulár no órgaun soberania sira, momentu ne’ebá husi MRLAP hahú halo estudu atu haree ba ninia implikasaun. Husi estudu ne’e ita hamosu proposta hodi haruka ba Konsellu Ministru maibé seidauk konsege halo ajendamentu”, tenik Portavóz MRLAP ba Agência TATOLI iha Palásiu Governu, segunda ne’e.

Notísia Relevante: Governu Planeia Reforma Lei Pensaun Vitalisia

Tuir koordenadora ne’e, ajendamentu iha Konsellu Ministru kompeténsia hosi PCM no Primeiru-Ministru mak tenke aprova.

“Iha momentu ne’ebá mós ita hahú preokupa orsamentu, tanba ne’e mak ita la konsege haree atu ajenda iha Konsellu Ministru maibé agora ita iha ona tentativa,  se la’ós fulan ne’e (janeiru 2020), entaun fulan oin mai atu bele aprezenta iha Konsellu Ministru”, nia akresenta.

Nia dehan tan, daudaun ne’e proposta lei ne’e fahe ona ba ministériu hotu no agora hein atu PCM marka de’it tempu atu MRLAP bele aprezenta.

Melisa esplika, iha proposta ne’e prevee oinsá mak atu hatama rejime pensaun vitalísia ba rejime seguransa sosiál.

Maski nune’e, nia dehan, rejime ne’e sei la elimina direitu ba ema ruma, liuliu ba órgaun titulár sira.

“Ita-nia titulár iha órgaun soberania sira, liuliu órgaun foun sira, fulan-fulan sira-nia saláriu ko’a ba seguransa sosiál atu aban bainrua bainhira tama hotu ba reforma mak foin hetan ita-ninia pensaun ida-ne’e maibé ita la elimina tanba hanesan sira-nia direitu ba kualkér ema ruma ne’ebé halo serbisu”, nia salienta.

Nune’e mós, Melisa hateten, hanesan seguransa sosiál kuandu ema ruma halo serbisu ko’a ba Estadu atu aban bainrua nia la serbisu ona bele hetan ninia pensaun ne’e, maibé ba titulár sira, iha proposta ne’e sei hamate rejime ne’ebé iha no hamosu rejime foun.

“Rejime uluk hosi estatutu deputadu sira-nia,n ita hamate artigu balun no hamosu rejime atu hateten katak hahú ida-ne’e sé mak sai titulár husi órgaun soberania, fulan-fulan bele ko’a ba seguransa sosiál, nune’e to’o aban bainrua kuandu reforma mak nia bele simu ninia pensaun vitalísia”, nia dehan tan.

Alterasaun Dahuluk Lei Pensaun Vitalísia, Reduz Persentajen Pensaun Eis-Deputadu No Eis-titulár

Iha loron 25 abríl 2017, Eis-prezidente Repúblika (PR) no atuál Primeiru-Ministru (PM), Taur Matan Ruak promulga diploma alterasaun dahuluk Pensaun Vitalísia ba eis-deputadu no eis-titulár husi kargu públiku sira, maibé nafatin fó kontestasaun liuhosi mensajen ba lei ne’e rasik.

Iha mensajen ne’e, PR hateten katak kontinua diskorda ho ezisténsia lei ne’ebé fó benifísiu ba eis-titulár sira, no afirma katak sei la uza pensaun ne’e bainhira nia mandatu ramata nu’udar PR.

Nia subliña katak pensaun ne’e hanesan previléjiu ezesionál ne’ebé laiha justifikasaun, ba klase polítika, enkuantu sidadaun sira sei dook husi moris no ai-han di’ak, sofre mal nutrisaun no limitasaun asesu ba bee-moos.

Alterasaun Proposta Lei Pensaun Vitalísia aprovadu iha Parlamentu Nasionál iha janeiru 2017, ho votu a-favór 42, kontra 5 no abstensaun 5.

Proposta Lei ne’e konsege hamenus husi pursentu 100 ba pursentu 60 husi vensimentu ba deputadu no eis-titulár sira ne’ebé ezerse kargu ho efetividade funsaun durante tinan lima tuir malu ka interpoladu.

Nune’e mós, hamenus husi pursentu 100 ba pursentu 75 husi vensimentu ba deputadu no eis-titulár sira ne’ebé ezerse kargu ho efetividade funsaun durante tinan sanulu tuir malu ka interpoladu, enkuantu hamenus pursentu 90 ba deputadu sira ezerse ona kargu durante tinan 15 tuirmalu.

Pensaun sei mantein pursentu 100 ba Prezidente Repúblika, pursentu 90 ba Prezidente Parlamentu Nasionál, Primeiru-Ministru no Prezidente Tribunál Rekursu.

Pagamentu ba pensaun ne’e sei akontese bainhira deputadu no eis-titulár sira kompleta ona tinan 50 no ramata ona ninia mandatu.

Jornalista: Julia Chatarina

Editór: Xisto Freitas

HAKEREK NO HATÁN

Please enter your comment!
Please enter your name here