Xefe Kaza Sivíl, Francisco María de Vasconcelos hamutuk ho funsionáriu sira hosi Palásiu Prezidensiál kuda ai-oan iha Faról. Imajen TATOLI/Cipriano Colo

DILI, 20 janeiru 2020 (TATOLI)–Prezidénsia Repúblika organiza kuda ai-oan iha tasi-ibun Faról, Dili, segunda ne’e, hanesan kontinuasaun ba ezekusaun kompromisu Prezidente Repúblika, Francisco Guterres Lú Olo katak, “sidadaun ida, ai-hún ida”.

Kuda ai-oan hala’o hosi Prezidénsia Repúblika, kompostu husi Xefe Kaza Sivíl, espoza Prezidente Repúblika, hamutuk ho funsionáriu sira.

Xefe Kaza Sivíl, Francisco María de Vasconcelos hateten, objetivu husi kuda ai-oan iha área tasi ibun Faról no área rezidénsia Xefe Estadu, atu kumpre nafatin kompromisu Prezidente Repúblika nian, ne’ebé dehan katak ‘sidadaun ida, ai-oan ida’.

“Tanba ne’e mak tinan kotuk Ita kuda ai-oan iha munisípiu sira, no tinan ida-ne’e, ita hahú kuda iha Dili, liuliu kuda ai-kásia hún atus ida no mós nú-hún lima-nulu ho tan ai sira seluk, hamutuk atus-rua resin ita kuda iha fatin ida-ne’e”, Xefe Kaza Sivíl dehan hafoin kuda ai-oan iha Faról.

Maski la temi detalla kona-ba fatin, maibé Xefe Kaza Sivíl informa katak iha tempu besik, Prezidente Repúblika sei bá halo lansamentu kuda ai parapa ne’ebé oras ne’e Prezidénsia Repúblika identifika, organiza no koordena ona.

“Oras ne’e dadus kompletu ona no iha inísiu fulan-fevereiru, sei bele kuda tan iha fatin seluk”, nia subliña.

Ai-oan ne’ebé Prezidénsia Repúblika prepara atu kuda iha programa ne’e mak hanesan ai-kásia, nú, mahoni, ho tan sira seluk.

Prezidénsia Repúblika mós koopera ho Ministériu Agrkultura no Peska (MAP), atu haree didi’ak ai ida-ne’ebé mak serve no merese duni hodi bele kuda iha fatin ne’ebé identifikadu ona, nune’e ai ne’e rasik bele sobrevive ho ambiente lokál nian.

Jornalista: Cipriano Colo

Editór: Xisto Freitas

HAKEREK NO HATÁN

Please enter your comment!
Please enter your name here