Koordenadora Interina ba Reforma Lejizlativa iha MRLAP, Melisa Silva Caldas. Imajen/Egas Cristovão

DILI, 20 janeiru 2020 (TATOLI)–Portavóz Ministériu Reforma Lejizlativa no Asuntu Parlamentár (MRLAP) no Koordenadora Interina ba Reforma Lejizlativa, Melisa Silva Caldas, informa iha lei barak ne’ebé tama pakote Lei Administrasaun Públika.

“Ita iha mós pakote Lei Administrasaun Públika. Hein ajendamentu iha Konsellu Ministru. Ita atu halo proposta lei barak kona-ba baze jerál administrasaun públika no mós projetu dekretu lei kona-ba administrasaun direta no indireta Estadu, liuliu kona-ba oinsá atu harii institutu públiku sira”, Melisa ba Agência TATOLI, iha Palásiu Governu, segunda ne’e.

Tuir koordenadora ne’e, iha administasaun públika presiza kontinua ho inisiativa balun atu hadi’a lei ne’ebé kria Komisaun Funsaun Públika, rekrutamentu ba kargu diresaun no xefia sira.

“Ida-ne’e hanesan pakote husi programa reforma administrasaun públika nian no sei iha lei barak atu hadi’a”, nia akresenta.

Nia subliña, tuir programa reforma administrasaun públika nian, sei toka iha área hirak iha ne’ebá, liuliu hahú hosi estrutura administrasaun públika ninian, kona-ba lei baze jerál no ordenasaun administrasaun direta no indireta Estadu nian.

“Ita mós hadi’a Komisaun Funsaun Públika nian kona-ba oinsá mak papél Komisaun Funsaun Públika nian no Governu nian husi nível diresaun jerál, nasionál. Oinsá mak bele fó podér ba Governu tuir Konstituisaun haruka tanba Konstituisaun hateten katak ita-nia administrasaun públika ne’e xefia hosi Governu, entaun oinsá mak ita bele fó filafali podér ba diretór jerál, diretór nasionál sira atu hala’o administrasaun públika Estadu nian maibé sempre koordena ho Komisaun Funsaun Públika”, Portavóz ne’e esplika.

Nia dehan tan, kona-ba rekursu umanu sei koordena mós ho Institutu Nasionál Administrasaun Públika (INAP) hodi halo formasaun.

“Ita sei ko’alia rekrutamentu ba diretór sira, rekrutamentu ba asesoria sira no ita presiza mantein rejime atuál ka presiza hadi’a filafali kona-ba kontratadu no saida mak funsionáriu públiku, kazuál no asesoria”, nia salienta.

Melisa haklaken, en-termu programa administrasaun públika ne’ebé koordena ho serbisu Ministériu Koordenadór Asuntu Ekonómiku (MAKE) nian maka kona-ba oinsá serbisu administrasaun públika nian ho serbisu Estadu nian bele favorese iha ambiente negósiu.

Nune’e mós, sei hahú serbisu ho Serviço de Registo e Verificação Empresarial (SERVE) para ajuda hadi’a sistema rejistu no lisensiamentu ba kompañia sira maibé liuhosi parte administrasaun públika.

Jornalista: Julia Chatarina

Editór: Xisto Freitas

HAKEREK NO HATÁN

Please enter your comment!
Please enter your name here