Sekretáriu Estadu Juventude no Desportu, Nélio Isaac Sarmento. Imajen Tatoli/Egas Cristóvão

DILI, 20 janeiru 2020 (TATOLI)–Sekretáriu Estadu Juventude no Desportu, Nélio Isaac Sarmento hateten Orsamentu Jerál Estadu (OJE) 2020 sumba iha Parlamentu Nasionál (PN) influénsia ba Timor-Leste atu sai uma-na’in ba jogu Komunidade Nasaun Ko’alia Lian Portugés (CPLP-sigla Portugés) ne’ebé sei hala’o jullu mai ne’e.

“Ho situasaun Orsamentu Jerál Estadu ne’ebé sumba iha Parlamentu Nasionál, klaru katak iha nia influénsia ba preparasaun atu realiza eventu CPLP ne’e rasik. Ita haree ida-ne’e desizaun Estadu nian. Estadu mak tenke introdús ba ita-nia sosiedade no ita-nia maluk nasaun CPLP sira katak ita prontu duni atu realiza jogu refere ka lae,” Nélio ba Agéncia Tatoli iha edifísiu Sekretaria Estadu Juventude no Desportu (SEJD), Lecidere, Dili, segunda ne’e.

Nia dehan, hanesan parte ne’ebé responsabiliza iha área tékniku nian kontinua halo nafatin preparasaun maski iha influénsia.

“Ninia influénsia ne’e mak saida? Influensia mak iha área lojístika nian balun. Aprovizionamentu balun tenke halo hodi kompleta nesesidade balun iha realizasaun jogu CPLP ne’e,” Nélio tenik.

Tanba ne’e, hanesan ema ne’ebé responsável másima iha área SEJD, nia parte hein de’it desizaun klaru hosi Primeiru-Ministru atu haree ba asuntu refere atubele iha baze hodi hakat bá oin.

“Semana oin iha vizita ida hosi komisaun akompañamentu ba jogu CPLP nian atu haree ba kondisaun preparativu ne’e. Agora, situasaun akontese nune’e ami tenke introdús buat ruma katak ita sei bele kontinua ka lae. Ita uza de’it osan duodésimu ne’e iha ninia limitasaun. Maibé, espíritu atu bá serbisu ne’e ami la’o nafatin. Ami kontinua hein de’it desizaun klaru ida katak ami bele realiza ka lae. Klaru katak hanesan Sekretáriu Estadu ha’u sei informa asuntu ne’e ba ha’u-nia ministra no Primeiru-Ministru atu dehan mai ami ita bele realiza eventu ne’e ho orsamentu duadesimál ka lae,” nia subliña.

Nia akresenta, alternativu seluk ne’ebé se Governu foti atu realiza jogu ne’e mak tenke la’o ho orsamentu duadesimál.

Jornalista: Hortençio Sanches

Editór: Xisto Freitas

HAKEREK NO HATÁN

Please enter your comment!
Please enter your name here