Ministru Agrikultura no Peska, Joaquim José Gusmão dos Reis Martins. Imajen/Egas Cristovão.

DILI, 20 janeiru 2020 (TATOLI) – Ministériu Agrikultura no Peska (MAP) utiliza Dotasaun Orsamentál Temporária (DOT) janeiru 2020 nian, liuliu iha kategoria kapitál dezenvolvimentu atu selu projetu sira ne’ebé tama ona iha prosesu aprovizionamentu iha 2019.

“Kapitál dezenvolvimentu MAP nian ne’e ba de’it planu reapropriasaun, agora, reapropriasaun ne’ebé MAP iha ne’e maka halo moru ba iha fatin oho animál nian, reabilita irrigasaun Oebaba, no mós retensaun ba irrigasaun Bilimau”, Ministru Agrikultura no Peska (MAP), Joaquim José Gusmão dos Reis Martins, ba TATOLI iha edifísiu MAP, ohin.

Joaquim haktuir, reapropriasaun no retensaun sira ne’e tama ona iha prosesu aprovizionamentu iha tinan kotuk.

“Prosesu sira ne’e tama tiha ona iha aprovizionamentu no la’o tiha ona, más iha 2019 ne’e seidauk selu, tanba ne’e projetu kapitál dezenvolvimentu nian, tau fali osan para selu”, dehan.

Iha DOT janeiru 2020 ne’ebé aloka ba MAP hamutuk $1,185,890, fahe ba kategoria sira hanesan saláriu no vensimentu $297,161, sasán no serbisu $814, 460 no kapitál dezenvolvimentu $74,269.

Jornalista : Antónia Gusmão

Editora : Maria Auxiliadora

HAKEREK NO HATÁN

Please enter your comment!
Please enter your name here