Eis Prezidente Repúblika, José Ramos Horta. Imajen/Egas Cristovão

DILI, 20 janeiru 2020 (TATOLI) – Premiadu Nobel ba Pás nian nu’udar mós  eis Prezidente Repúblika, José Ramos Horta,  hato’o nia apresiasaun ba servisu Tribunal Distritál Dili nian, liuliu iha relasaun ho desizaun absolve arguido Vicente Guterres, eis prezidente Parlamentu Nasional husi kazu partisipasaun ekonomia no indemnizasaun.

Notísia Relevante : Tribunal Absolve Vicente Guterres ho Arguido Na’in Rua Seluk

Liuhusi desizaun final, ohin, Juiz António Fonseca, absolve mós  arguido na’in rua seluk; João Rui Amaral, nu’udar eis Diretór Jerál Sekretariadu PN ho  Francisco Soares “Borlaku” nu’udar eis Diretór Nasionál Aprovizionamentu Ministériu Finansa (MF).

“Ha’u kontente ho justisa tanba rona esplikasaun juiz kapás no furak, hola desizaun absolve arguido nain tolu, tanba liuhusi avaliasaun no faktu sirkunstánsia hot-hotu,”  hateten José Ramos Horta, hafoin akompaña prosesu julgamentu iha TDD, ohin.

Iha fatin hanesan, defeza José Guterres ba arguido Jose Rui Amaral sente kontente ho desizaun Tribunál nian, hodi absolve arguido nain tolu husi krime ne’ebé imputa ba nia.

“Ha’u hanoin Tribunál foti desizaun ne’ebé matenek, tanba ba kazu ida ne’e Tribunál foti desizaun ho matenek haree ba provas sira hot-hotu ne’ebé deklarasaun husi testemuña, dokumentu sira ne’e tama iha Tribunál”, tenik nia.

Iha audiénsia julgamentu ne’e asiste mós husi lider karizmátiku atuál prezidente partidu CNRT, Kay Rala Xanana Gusmão, hanesan mós testemuña prinsipál iha prosesu julgamentu ne’e.

Jornalista : Domingos Piedade Freitas

Editór       : Francisco Simões

HAKEREK NO HATÁN

Please enter your comment!
Please enter your name here