Diretór Nasionál Ensinu Rekorrente (DNER), Miguel Martins. Imajen: Tomé Amado

DILI, 20 janeiru 2020 (TATOLI) – Totál Estudante Ensinu Rekorrente hamutuk ema 170 ne’ebé pasa ona iha ezame ekivalénsia Ensinu Báziku Terseiru Siklu nian, hetan ona rekomendasaun husi Dirasaun Nasionál Ensinu Rekorrente (DNER) atu kontinua sira-nia estudu iha ensinu sekundária.

Diretór Nasionál Ensinu Rekorente (DNER), Miguel  Godinho Martins hateten, estudante ema 170 ne’e hetan ona rekomendasaun husi DNER no agora sira barak mak kontinua tama fali iha nivel ensinu sekundáriu hodi kontinua hetan diploma.

“Sira balun foin daudaun mai husu rekomendasaun tanba idade sei ki’ik entaun hakarak kontinua fali ba nivel ensinu sekundáriu  entaun ita fasilita sira,”  Miguel Godinho Martins dehan ba Agência TATOLI iha ninia gabinete DNER SKB, Vila Verde, Dili, segunda (20/01/2020).

Nia hatutan, estudante 170 ne’e kuaze 50% mak sei idade produtivu entaun sira iha oportunidade atu bele tama iha nivel  ensinu sekundáriu, tanba ne’e mak Ministériu fasilita sira ninia rekomendasaun atu nune’e sirabele hetan fatin.

Realidade, nia informa, estudante lubuk ida mak eskola ona, espera katak sira bele mantein to’o ramata hodi hetan fali sira-nia diploma.

Husi prosesu ba tinan ida ne’e nian, tuir nia, DNER loke ona inskrisaun ba estudante foun ensinu rekorrente terseiru siklu nian iha Sentru Komunitária Aprendizazen hamutuk 10, atu nune’e bele kontinua apoiu maluk timoroan sira ne’ebé mak antes ne’e para sira ninia estudu iha dalan klaran.

“To’o agora inskrisaun sei la’o hela tanba programa ne’e loke mós ba adultu entaun presiza tempu to’o fulan ida. Purtantu, ita seidauk hatene totál estudate hira mak rezista ona tanba prosesu inskrisaun ne’e sei la’o hela,” nia hateten.

Kona-ba planu ne’ebé DNER trasa tiha ona, nia informa, ne’e planu maibé buat hotu depende ba orsamentu. Agora, nia dehan, Orsamentu Jerál Estadu (OJE) 2020 ne’ebé sumba iha Parlamentu Nasionál mak limita planu no programa ne’ebé mak kria ona.

“Entaun, ha’u bele dehan DNER labele halo buat ida maibé hanesan liman-ain governu nian kontinua hein nafatin,” nia dehan.

Notísia relevante:Ensinu Rekorrente Iha Covalima Seidauk Kobre Suku Hotu

Jornalista : Tomé Amado

Editór       : Rafy Belo

1 KOMENTÁRIU

  1. Atan ami husu ba DNER atu loke secundariu(SMA)ona para ami nebe idade bot sira bele kontinua fali estudo no Agora dadaun acaba ona ensino basico hotu maibe halimr dt,ami atu kompete travalho iha Rai laran ou Rai liur ne ami labele kompete ho maluk sira nbe hanesan secundariu,D3,S1 ami kompete ho sira ami lakon sira maske Ami ih kuinese ituan ituan .
    agora dadaun Ami estudante equevalensia Hein hela DNER atu loke secundariu (SMA) para ami sira idade bot ne kontinua .

HAKEREK NO HATÁN

Please enter your comment!
Please enter your name here