Prezidente Federasaun Atletizmu Timor – Leste, Afrânio Xavier Amaral. Imjen Tatoli/Dok

DILI, 20 janeiru 2020 (TATOLI)–Prezidente Konfederasaun Desportiva Timor-Leste (CDTL-sigla Portugés), Afrânio Xavier Amaral hateten programa prioridade ne’ebé atu realiza iha 2020, sira-nia parte mantein nafatin kalendáriu rua ne’ebé fiksu ona hanesan jogu Komunidade Nasaun Ko’alia Lian Portugés (CPLP-sigla Portugés) no Olimplic Games ne’ebé sei realiza iha Tokyo, Japaun, agostu tinan ne’e.

“Ami-nia programa kontinua mantein kalendáriu atu ba eventu boot rua ne’ebé sei realiza tinan ida-ne’e hanesan jogu CPLP no Olimpic Games ne’ebé sei realiza iha Tokyo,” Afrânio ba Agéncia Tatoli, iha edifísiu CDTL, Caicoli, segunda ne’e.

Nia dehan, hanesan federasaun no konfederasaun desportiva kontinua mantein pozisaun hodi halo atividade desportu nian.

“Ita sei la influénsia ba polítika tanba ida-ne’e parte ketak ne’ebé mosu iha nasaun ne’e. Maibé, desportu hala’o treinamentu nafatin atu lori nasaun ne’e ba oin hodi reprezenta Timor-Leste,” nia dehan.

Kona-ba orsamentu atu iha ka laiha depende ba Sekretaria Estadu Juventude no Desportu (SEJD).

“Orsamentu ita entrega hotu ba Governu mak haree tanba sira mak hatene loloos kona-ba orsamentu iha ka laiha ba federasaun sira,” nia haklaken.

Nia subliña, daudaun ne’e modalidade hotu ne’ebé hamahan-an iha CDTL kontinua hala’o treinamentu hodi prepara ba atividade ne’ebé sei akontese.

Jornalista: Hortençio Sanchez

Editór: Xisto Freitas

HAKEREK NO HATÁN

Please enter your comment!
Please enter your name here