Institute of Education (IE) fó teste ba foin-sa'e na'in-635 iha Eskola Báziku Sérgio Vieira de Mello, Becora, domingu ne'e. Imajen Tatoli/ Evaristo Soares Martins

DILI, 19 janeiru 2020 (TATOLI)—Institute of Education (IE) fó teste ba juventude na’in-635. Teste hala’o hodi hatene foin-sa’e ne’ebé mak merese tuir formasaun.

Diretór Ezekutivu Institute of Education, Gaspar da Silva Fernandes hateten institutu ne’e ho vizaun lalenok ba edukasaun. Misaun mak promove no dezenvolve formasaun profisionál ba foin-sa’e timoroan sira iha setór edukasaun naun-formál.

Nia dehan, sei hala’o didi’ak avaliasaun ba juventude na’in-635 sira-nia rezultadu teste eskrita no orál tanba alvu institutu nian sei presiza ema na’in atus-ida resin.

“Ami sei halo koresaun ba sira-nia teste eskrita no orál hafoin ami sei anúnsia iha 26 janeiru. Ami labele foti hotu tanba ami tenke presiza sira ne’ebé valór aas atu nune’e ami bele prepara joven sira-ne’ebé iha talentu no iha kapasidade hodi kompete kampu traballu iha futuru”, nia informa ba jornalista sira iha fatin hala’o teste, Ensinu Báziku Sérgio Vieira de Mello, Becora, domingu ne’e.

Matéria ne’ebé IE oferese ba juventude mak língua ingléz no portugés no materiál nian. Durasaun kursu ne’e balun fulan tolu no fulan neen hafoin fó sertifikasaun.

Nia hateten katak kursu ne’e fó oportunidade ba joven sira ne’ebé ramata ensinu sekundáriu maibé la kontinua ba ensinu superiór, entaun institutu sei fó formasaun ba sira.

Kursu ne’ebé institutu sei oferese mak hanesan lian ingléz, portugés, siénsia informátika, administrasaun no siénsia governamentál.

“Tinan ida-ne’e tuir planu ami oferese tan Diploma-1 hanesan siénsia govenamentál no marketing nian”, Diretór Ezekutivu IE ne’e haklaken.

Gaspar informa formasaun parte hosi programa “Leadership Training” ho objetivu fundamentál hakbiit koñesimentu juventude liuhosi formasaun lideransa nu’udar investimentu nasaun ba futuru.

Iha fatin hanesan, partisipante Verónica Godinho, fiar katak sei liu iha teste ne’e tanba nia parte hakarak hasa’e ninia koñesimentu iha área lideransa no siénsia informátika.

“Ha’u kontente tebes. Ha’u fiar katak ha’u sei ultrapasa teste. Bainhira ha’u liu ona ha’u sei uza didi’ak oportunidade ne’e hodi gaña esperiénsia liuhosi Institute of Education ne’e”, Verónica espresa.

Jornalista: Evaristo Soares Martins

Editór: Xisto Freitas

HAKEREK NO HATÁN

Please enter your comment!
Please enter your name here