Adjunta Sekretária Jerál KO25 no atuál Prezidente CNJTL, Maria Dadi Soares Magno. Imajen Tatoli/Antónia Gusmão

DILI, 18 janeiru 2020 (TATOLI) – Maria Dadi Soares Magno eleitu husi kongresista sira hodi sai prezidente CNJTL (Konsellu Nasionál Juventude Timor-Leste) ba périodu tinan lima tan, hahú 2020 to’o 2025. Maria Dadi eleitu ho votu konfiansa hamutuk 304.

Hafoin eleitu nu’udar prezidente, Maria Dadi Magno kompromete katak durante tinan lima, iha périodu dahuluk nia parte sei identifika grupu alvu kona-ba dezempregu, ne’ebé afeta barak liu ba joven sira.

Tanba ne’e, tuir nia, CNJTL tenke sai parseria ida importante, prinsipál no estratéjiku ba polítika Nasionál Juventude nian rasik, depois tenke sai mós organizasaun ida ne’ebé atu superviziona kona-ba implementasaun polítika nasionál ne’e rasik.

“Ha’u kontinua haree ida ne’e no kontinua peskiza ba dadus joven dezempregu sira tanba durante ne’e ita opta de’it dadus UNDP no UNICEF sira nian. Agora tempu to’o ona ita rasik mak halo tanba ita mak hatene,” Prezidente CNJTL, Maria Dadi Magno dehan ba Jornalista sira iha Sentru Konvensaun Dili (CCD, sigla portugés), Dili, ohin.

UNDP ne’e katak Programa Nasaun Unida ba Dezenvolvimentu ka PNUD no UNICEF ne’e nu’udar Organizasaun Nasaun Unida ba Edukasaun, Siénsia no Kultura).

Nia relata, iha dadus joven rihun 48 ne’ebé tama iha kategoria NET-Not in Education, Employment or Training (La asesu ba edukasaun, serbisu no formasaun). “Entaun ho polítika labele husik ema ida iha kotuk, CNJTL hanesan organizasaun sumbriña ba kamada juventude hotu, sei loke liman hodi influénsia situasaun estadu uainhira hakarak halo mudansa ba sira-nia vida”.

Maria Dadi Kompete ho Juvinal Dias

Entretantu, Maria Dadi Magno kontinua prezidente CNJTL ba périodu ida tan depois kompete ho Juvinal Dias. Kompetisaun ne’e kompostu husi Pakote A, lideradu husi Juvinal Dias ho nia estrutura no Pakote B mak Maria Dadi Magno ho nia estrutura mós.

Antes tama ba faze eleisaun ne’ebé la’o iha euforia ne’ebé demokrátiku, kada kandidatu husi pakote idaidak hato’o nia kampaña perante kongresista no observadór sira.

Iha kampaña, ne’ebé pakote idaidak atribui minutu lima husi komisaun eleitorál, Pakote A ne’ebé lidera husi Juvinal Dias hateten katak karik nia hetan konfiansa husi kongresista nu’udar Prezidente, nia sei muda CNJTL sai movimentu tanba konsidera tinan barak CNJTL sai fali instituisaun administrativa; durante ne’e hein de’it proposta hodi la preokupa ho injustisa no pobreza.

“Loloos CNJTL tenke hatuur ninia aan hodi sai matadalan hodi lori aspirasaun maluk juventude sira nian hodi hetan tratamentu ida adekuadu iha nasaun ne’e”.

Nia mós kompremete sei fasilita kapasitasaun ba membru sira atu nune’e bele sai parte integradu ida. Nune’e mós, sei ajuda membru sira ne’e, presiza apoiu finansiamentu tanba osan ne’ebé CNJTL iha, membru sira nian la’ós estrutura nian. Tanba ne’e, nia sei halo mudansa iha tinan lima nia laran.

Enkuantu, adversáriu Juvinal Dias ba kompetisaun ne’e, kandidatu pakote B, Maria Dadi Magno afirma, maske iha kompetisaun ne’e mosu lista rua maibé membru sira iha kongresu nia laran ne’e ida de’it, kongresista sira tenke hatudu paradigma foun. “Mai hamutuk ho ha’u ita lori mudansa foun ba CNJTL,” nia kompromete.

Depois kampaña pre-eleitorál husi pakote idaidak, hakat ba eleisaun. Nune’e, bainhira eleisaun hotu no tama ba faze apuramentu finál, husi totál kongresista na’in 457 ne’ebé partisipa iha eventu sufraziu universál ne’e identifika katak kongresista na’in 433 mak ezerse sira-nia votu enkuantu kongresista na’in 24 lae.

Iha apuramentu finál ne’e, rezultadu hatudu katak husi totál votante hamutuk na’in 433, Pakote A ne’ebé lidera husi Juvinal Dias hetan votu konfiansa hamutuk votante 126 kompara ho Pakote B ne’ebé lidera husi Maria Dadi Magno rekolla valór finál husi votante sira hamutuk 304. Ho rezultadu apuramentu finál ne’e “vensedora eleisaun” mak Pakote B, Maria Dadi Magno.

Nune’e, konkluzaun katak Maria Dadi Magno mak sai prezidente CNJTL, hahú husi 2020 to’o 2025.

Eleisaun CNJTL, tuir observasaun TATOLI nian nota katak la’o iha ambiente ne’ebé mak demokrátiku, promove respeitu mútuo entre kandidatu no apoiante sira, iha situasaun hakmatek no armónia laran, hahú husi ínisu to’o apuramentu finál ba rezultadu eleisaun ba prezidénsia CNJTL nian.

Notísia relevante:Preparasaun ba Kongresu CNJTL Atinje Ona %85

Jornalista    : Tomé Amado

Editór          : Rafy Belo

HAKEREK NO HATÁN

Please enter your comment!
Please enter your name here