Prezidente Repúblika, Francisco Guterres Lú Olo. Imajen/TATOLI

DILI, 18 janeiru 2020 (TATOLI)–Prezidente Repúblika (PR), Francisco Guterres Lú Olo konsidera juventude mak povu no nasaun Timor-Leste (TL) nia ai-riin. 

Konsiderasaun ne’e, Xefe Estadu hato’o liuhusi diskursu enserramentu ba kongressu dalimak Conselho Nacional  da Juventude Timor-Leste (CNJTL-sigla Portugés), iha Centro Convencões de Dili, ohin.

“Juventude mak povu no nasaun Timor-Leste nia ai-riin. Juventude hamriik kedas husi tempu ne’ebé ita hahú organiza-an hodi luta ba ita-nia identidade, nu’udár povu no nasaun. Onra boot mai ha’u marka prezensa iha-ne’e atu hato’o rasik ha’u-nia apoiu tomak ba CNJTL, nu’udár líder iha tempu rezisténsia no nu’udár Prezidente Repúblika”, PR Lú Olo hato’o liuhusi diskursu.

Xefe Estadu hateten kongresu ida-ne’e hadi’a hela estatutu, regulamentu sira no sei hili líder foun no fiar katak CNJTL sei la’o di’ak liután tinan lima tuirmai.

Nia subliña, importante ba hotu-hotu maka hatuur istória loloos rezisténsia juventude nian ho faktu, molok haluha ka mate.

Ho objetivu ida-ne’e, PR Lú Olo hakarak fó hanoin ohin katak CNJTL mai husi istória naruk ida, tanba nia hún mak organizasaun rezisténsia sira tuirmai ne’e: OJETIL, OPJELATIL, FITUN, Sagrada Família, UNIAMORTE, UJTL, Ativista Prokemerdekaan, Dewan Solidaritas, CNJ, Uniaun Morte, RENETIL, DPP IMPETU, BPPM/Aliansa Juventude Maubere no Organizasaun Trabalhadores “Moris Dame”, Fuan Domin, AHOC no AST.

Nia dehan tan, nu’udár organizasaun joven sira-nian, hamahon-an iha FRETILIN-Movimentu ka nu’udár organizasaun estudantes, organizasaun sira-ne’e mak harii Prezidium Juventude Lorico Aswa’in (PJLA), iha marsu 1999, hafoin hetan malu ho líder Conselho Nacional da Resistência Timorense (CNRT), Xanana Gusmão, iha Salemba, Jakarta.

Nia hatutan, hafoin akordu 5 Maiu 1999, PJLA harii iha Dili, nu’udár organizasaun-sombriña organizasaun juventude sira-nian hodi serbisu hamutuk ho CNRT-Rezisténsia, atu alkansa objetivu Ukun Rasik-an. Maibé, PR hateten, organizasaun ne’ebé de’it la buras sein ema.

“Nune’e, ha’u hakarak temi no rekoñese líder joven sira, ne’ebé barani lidera no kaer metin organizasaun sira, iha tempu rezisténsia no ukun-an. Iha 1999, PJLA lidera uluk husi Juvêncio Martins, Mariano Assanami no Zebra Metan. Iha Outubru 1999, liuhusi kongresu nasionál, kongresista sira eleje Ricardo Ribeiro, José da Costa, Leovigildo Hornai no Costa Brandão, nu’udár líder PJLA nian. Iha kongresu ba dala rua, halo iha 2002, PJLA nakfilak ba CNJTL no hili Miguel Manetelo, nu’udár Prezidente. Terseiru no kuartu kongresu hili Leovigildo Hornai, no ikus mai CNJTL lidera husi Dadi Magno. CNJTL sei lidera iha tinan lima tuirmai husi joven líder foun ida ba tinan sira tuirmai. Perkursu ida-ne’e hatudu katak imi joven sira dedika-an duni ba ita-nia kauza nasionál: Liberta Pátria no Liberta Povu”, Xefe Estadu rekoñese.

Durante funu ba libertasaun nasionál, PR Lú Olo konta tuir, iha área libertada, organizasaun rezisténsia juventude sira-nian fó an tomak hodi organiza área sira-ne’e no partisipa iha programa alfabetizasaun, saúde, atividade produsaun no seluk-seluk. Bainhira baze apoiu rahun, juventude kontinua sira-nia asaun iha vila-laran no iha tempu oportunu, konsegue lori duni funu libertasaun nasionál tama ba inimigu nia uma-laran.

“Juventude Lorico Aswa’in sira-nia partisipasaun iha luta libertasaun nasionál importante tebes ba ita-nia vitória finál: Ukun Rasik-an. Nune’e, ohinloron, organizasaun rezisténsia juventude sira-nian, ne’ebé hamahon-an iha CNJTL, iha obrigasaun hodi valoriza no kontinua legadu husik husi juventude rezisténsia; husi Lorico Aswa’in sira ne’ebé luta iha rai-laran no husi sira ne’ebé lori luta ba inimigu nia uma-laran no mós husi sira ne’ebé namkari iha Portugál, Austrália no rai sira seluk”, nia esklarese.

Partisipa iha loron ikus Kongresu Nasionál dalimak CNJTL mak hanesan Arsebispu Metropolitanu Arquidioseze Dili, Don Virgílio do Carmo da Silva, Prezidente CNJTL, Dadi Magno no ekipa tomak membru husi organizasaun juventude rezisténsia, juventude hosi partidu polítiku sira, kongresista sira no konvidadu sira.

Jornalista: Cipriano Colo

Editór: Xisto Freitas

HAKEREK NO HATÁN

Please enter your comment!
Please enter your name here