Arsebispu Metropolitana Arkidioseze Dili, Mgr. Virgílio do Carmo da Silva, SDB. Imajen/TATOLI

DILI, 18 janeiru 2020 (TATOLI) – Arsebispu Metropolitana Arkidioseze Dili, Mgr. Virgílio do Carmo da Silva, SDB, konsidera, foin-sa’e mak protagonista ba buat hotu ne’ebé folin ba ohin loron no ba futuru família, komunidade, sosiedade ho nasaun ne’ebé di’ak.

Notísia Relevante : Ba Juventude Timor, Amu Belo Husu Hametin Unidade

Bispu Virgilio do Carmo da Silva, SDB hateten lia hirak ne’e iha nia mensajen  iha ámbitu  Kongresu  Konsellu Nasionál  Juventude Timor-Leste (CNJTL), ohin, ne’ebé hala’o iha Centro Conveção Dili (CCD).

Administradór Apostoliku Dioseze Dili  ne’e fó sasin katak, kreda Timor-Leste rekoñese papél juventude ninian dezde uluk parókia to’o dioseze sira. foin-sa’e sempre partisipa iha forma oioin no iha uma kreda nia moris no kreda fiar nia foin-sa’e sira.

“Imi (foin-sa’e) mak folin boot tebes no mós fó imi-nia kontribuisaun ba uma kreda  ne’ebé ita haree iha organizasaun ne’ebé tama iha grupu oioin hodi hasoru dezafiu, maibé konsege realiza mehi,” afirma Amu Virgilio do Carmo da Silva.

Nia afirma tan, foin-sa’e timoroan sira barak mak fakar-ran ba rai ida ne’e tanba iha tempu ne’ebá sira harii sira-nia unidade makaas entre sira. Maibé sira mós la ta’uk realiza sira-nia mehi. Nune’e ukun rasik-an realiza no sai realidade.

Amu Virgilio husu ba foin-sa’e Timoroan presiza hatudu fuan boot no otimizmu ba dezafiu oioin nia laran. Basá,  foin-sa’e mak ai-riin ba nasaun ida ne’e nian no ba futuru nian.

“Imi foin-sa’e sira hamutuk, ita iha  pás no hakmatek,” hateten Bispu Virgilio do Carmo da Silva, SDB.

Jornalista : Osória Marques

Editór       : Francisco Simões

HAKEREK NO HATÁN

Please enter your comment!
Please enter your name here