Xefe Laboratóriu Sentrál Pratika, Domingas Belo Amaral Mendes. Imajen: Tome Amado

DILI, 17 janeiru 2020 (TATTOLI) – Xefe Laboratóriu Sentrál Pratika, Domingas Belo Amaral Mendes, hateten Sentru Estudu Siénsia no Matematika (SESIM) semana oin sei realiza atividade ekstrakurikular liuhusi eventu akampamentu.

Nia hatutan, akampamentu ne’e hodi hasa’e koñesimentu no abilidade ba grupu feto sira kona-ba siênsia teknolojia enjiñária no matemátika iha nivel ensinu sekundária no akampamentu ne’e sei konsentra iha laboratóriu sentrál pratika iha Eskola Ensinu Báziku Terseiru Siklu 30 de Agostu Comoro.

“Objeitivu husi atividade ne’e atu hasa’e interese labarik feto sira nian iha área siénsia teknolojia enjiñária no matematika  atu nune’e bele introdús ba sira kampu traballu. Bainhira sira fila, bele halo fali grupu ki’ik ida iha sira-nia eskola atu nune’e bele motiva malu hodi hili área refere,” dehan Domingas Belo Amaral Mendes ba Ajênsia TATOLI iha Laboratoriu Sentrál Pratika 30 de Agostu, Comoro, Dili, ohin.

Tanba ne’e, nia hatutan, bazeia ba dadus kapasitasaun siénsia no Matemátika ne’ebé SESIM fó ba mestre sira mak SESIM nota katak iha área enjiñária partisipasaun feto sira-nian minimu tebes.

Tan ne’e, nia dehan, SESIM realiza atividade ne’e atu introdús ba maluk feto sira kona-ba disiplina atu nune’e ba futuru bele komprende área ne’ebé sira sei serbisu ba.

“Ita-nia intensaun ba programa ida ne’e, tanba dala barak iha eskola sira hetan de’it mak teoria. Tanba ne’e mak ita hamosu atividade ne’e hodi loke sira-nia hanoin no motiva sira atu iha ona interrese ba futuru,” nia dehan.

Nia dehan, atividade akampamentu ne’e sei loke oportunidade ba grupu feto sira ne’e atu halo konstrusaun ruma ne’ebé liga ba dezeñu no enjiñária.

Ne’ebé, tuir nia, planu ne’e sei bázeia ba topíku tolu oinsa atu konstrui buat ruma husi materia siênsia no Matemátika nian. Atividade ne’e mós sei  atrai sira liuhusi video ambiente nian liu husi kalohan no planeta sira iha lalehan.

Nune’e mós, nia dehan, kada grupu feto sira husi kada eskola ne’e sei fahe mós informasaun ba malu kona-ba atividade saida mak sira halo ona iha ida-idak nia eskola.

Nia haktuir, atu konkista partisipasaun estudante feto sira-nian iha área haat ne’ebé mensiona mak SESIM distribui uluk sirkulár ida ho ninia pergunta ba eskola sira.

Iha pergunta sira ne’e, nia dehan, presiza maluk feto sira ne’e tenke prienxe hafoin mak sentru sei rekolla fali hodi halo selesaun bazeia ba interrese ne’ebé mak fahe ona ba área haat refere atu nune’e bele hetan ninia balansu.

Atividade sira ne’e, tuir nia, bainhira ramata la’ós para de’it nune’e maibé SESIM sei apoiu fali fundus uitoan ba partisipante feto sira husi kada eskola sira ne’e, atu bele kontinua fali atividade ki’ik iha sira-nia eskola nu’udar fini lider iha fali sira nia eskola.

Nia dehan, iha fatin akampamentu grupu feto sira ne’e sei halo vizita ba Pawer Plan Hera, Laboratóriu Nasionál Saude, área Metereolojia Jeofizika, SAS, HEINEKEN, Sentru Formasaun Tékniku Dom Bosco, Sentru Tékniku Tibar, GMN no Telekomcel.

Orsamentu ba atividade ne’e, nia informa, sei prevee $3.000 ne’ebé hetan apoiu husi Participation Programe UNESCO Paris. Nia dehan, orsamentu sira ne’e mak sei apoiu hodi fasilita transportasaun, han no balun sei apoiu ba grupu sira ne’e atu kontinua fila fali atividade iha sira-nia eskola.

Nia haktuir, partisipante husi grupu estudante feto sira ne’e hamutuk 46 mai husi munisipiu hitu (7) hanesan Dili, Bobonaro, Covalima, Ermera, Liquiça, Manatuto no Viqueque.

“Agora partisipanteshusi eskola fora husi Dili nian sei fó estudante feto na’in hitu no husi Dili rasik na’in haat de’it. Atividade ne’e ninia akampamentu iha aredór Eskola Ensinu Báziku Terseiru Siklu 30 de Agostu Comoro,” nia esplika.

Jornalista : Tomé Amado

Editór      : Rafy Belo

HAKEREK NO HATÁN

Please enter your comment!
Please enter your name here