Prezidente Autoridade RAEOA-ZEESM, José Luís Guterres ‘Lugu’. Imajen Tatoli/António Gonçalves.

DILI, 17 janeiru 2020 (TATOLI) – Prezidente Autoridade Rejiaun Administrativa Espesiál Oe-Cusse Ambeno (RAEOA) no Zona Espesiál Ekonomia, Sosiál no Merkadu (ZEESM), José Luis Guterres “Lugu”, hateten kontinua enkoraja emprezáriu husi rai-laran no li’ur atu halo investimentu iha área saida de’it iha RAEOA.

“Ita loke mós dalan ba iha setór privadu rai-laran no li’ur atubele mai halo investimentu ba kualkér área iha Oe-Cusse”, Prezidente Autoridade RAEOA-ZEESM, José Luis Guterres, hafoin asina akordu ho Empreza Of Line Development Inc., husi Estadu Unidu Amérika (EUA) iha edifísiu RAEOA-ZEEMS, Faról, ohin.

Lugu dehan Timor-Leste iha relasaun di’ak ho Indonézia, Austrália, Nova Zelándia, Japaun, Xina no Portugál no nasaun seluk ne’ebé loke dalan atu mai hala’o investimentu iha rai-ketan.

“Loke an ba investimentu, maibé ita respeita nafatin povu Timor-Leste nia interese liuliu povu iha rai Oe-Cusse, atubele fó moris ba povu”, katak.

Hodi dehan RAEOA kontinua salva guarda interese Estadu nian partikularmente Oe-cusse para investimentu ruma mai mós tenke iha respeitu ba meiu ambiente, direitu povu nian relasiona ho rai no kultura atu fó benefísiu ba sira.

“Ami-nia idea mak ita mai investe, maibé hanoin mós povu ne’ebé moris iha fatin ida ne’e”, dehan.

Loke an ba investimentu, eis Ministru Negósiu Estranjeiru ne’e dehan tanba Oe-Cusse oan ka Atoni-oan garante pás no sosiál no mós garante kontratu ida ho durasaun razoavel para sira (empreza) bele hetan lukru no garante mós la muda kontratu arbiru.

“Tanba ne’e mak ami hakarak hodi dehan katak Oe-Cusse hakarak business (negósiu)”, subliña.

Autoridade RAEOA ne’e dehan hakarak dezenvolvimentu iha Oe-Cusse la’o lalais, maibé ho seguransa no garante benefísiu ba povu Atoni.

“Ita la presiza depende de’it ba Fundu Mina-rai, maibé ita dezenvolve mós atividade seluk hanesan turizmu no seluk atu troka Fundu Mina-rai iha futuru”, adianta.

Hodi dehan: “Ita hahú kria kondisaun balun hanesan pás no sosiál, infraestrutura hanesan aeroportu no eletrisidade inklui infraestrutura internét, komunikasaun no teknolojia (ICT, sigla inglés) ne’e mak kondisaun ne’ebé garante ba iha setór privadu sira ne’ebé hakarak mai investe”, hakotu.

Notísia relevante : Autoridade RAEOA-ZEESM Asina Akordu Investimentu ho Empreza EUA

Jornalista :  Florencio Miranda Ximenes

Editora : Maria Auxiliadora

HAKEREK NO HATÁN

Please enter your comment!
Please enter your name here