Aprezentasaun no votasaun ikus ba OJE 2020 iha jeneralidade, iha PN. Imajen Tatoli/ Egas Cristóvão

DILI, 18 janeiru 2020 (TATOLI)—Xefe Bankada Parlamentár FRETILIN, Aniceto Guterres, hateten Prezidente Repúblika (PR), Francisco Guterres ‘Lú Olo’ iha dalan-rua atu responde ba situasaun atuál–disolve Parlamentu Nasionál ka demite Governu.

Xefe Bankada FRETILIN ne’e ko’alia kestaun ne’e bazeia ba deklarasaun Primeiru-Ministru, Taur Matan Ruak, hateten orsamentu 2020 la pasa ona iha jeneralidade, tanba ne’e hein desizaun hosi Prezidente Repúbika, Francisco Guterres ‘Lú Olo’.

“Orsamentu la pasa iha faze jeneralidade, la bá ona espesialidade. Katak, Proposta Lei Orsamentu 2020 ne’e sumba ona”, nia deklara.

Tuir Aniceto nia interpretasaun, Governu bele aprezenta tan proposta kuandu iha fali sesaun lejizlativa foun ne’ebé sei hahú iha 15 setembru 2020. Enkuantu ida-ne’e seidauk iha nasaun ida-ne’e kontinua moris ho duodésimu.

Lee mós: Proposta OJE 2020 La Pasa

“Situasaun hirak-ne’e mosu tanba iha Aliansa Mudansa ba Progresu (AMP) laran la entende malu. Balun vota vota abstensaun. Ne’e mak halo orsamentu ne’e la pasa. Até ha’u hakarak hateten deputadu FRETILIN nian 23 ne’e, deputadu 12 mak la tama bá vota. FRETILIN nian iha  de’it deputadu 11”, nia dehan hafoin proposta lei Orsamentu Jerál Estadu (OJE) 2020 la pasa iha Parlamentu Nasionál, sesta ne’e.

Tuir Konstituisaun RDTL artigu 112 alíneia 1 (bainhira Governu nia knaar ramata) no hosi alíneia 1(b) hateten kona-ba Prezidente Repúblika simu pedidu demisaun hosi Primeiru-Ministru.

Nune’e mós artigu 86 (kompeténsia kona-ba órgaun sira seluk), alíneia f, hateten Prezidente Repúblika hakotu Parlamentu Nasionál iha kazu boot krize institusionál ne’ebé labele iha formasaun Governu ka aprovasaun Orsamentu Jerál Estadu nian, iha tempu naruk liu loron neen-nulu (60), bainhira rona tiha ona partidu polítiku sira ne’ebé hetan kadeira iha Parlamentu Nasionál, no rona Konsellu-Estadu, iha tempu ne’ebé laiha kdasar atu hala’o disolusaun, tenke hatuir regra iha artigu 100 (disolusaun).

Jornalista: Evaristo Soares Martins

Editór: Xisto Freitas

HAKEREK NO HATÁN

Please enter your comment!
Please enter your name here