Diskusaun proposta OJE 2020 iha plenária Parlamentu Nasionál, kinta (16/01/2020). Imajen Tatoli/ Egas Cristóvão

DILI, 17 janeiru 2020 (TATOLI)—Prezidente Parlamentu Nasionál (PPN), Arão Noé de Jesus da Costa Amaral, husu ba deputadu sira atu hahú hatama ona proposta molok tama debate faze espesialidade iha segunda, semana oin.

Tuir ajenda, debate faze espesialidade sei hahú hosi segunda, 20 janeiru to’o 31 janeiru no bainhira Komisaun C (trata Finansa Públika) finaliza redasaun finál sei enkamiña kedas ba Prezidente Repúblika.

“Meza sei fó estensaun to’o aban loraik. Tékniku sira hosi sekretariadu sei serbisu hodi verifika proposta sira-ne’e, nune’e segunda fasilita ita debate espesialidade”, Arão Noé aviza liuhosi plenária, sesta ne’e.

Tanba, tuir Prezidente Parlamentu Nasionál, se laiha propsota sei la diskute artigu sira maibé kontinua avansa ba oin.

Tuir Rejimentu Parlamentu Nasionál (artigu 103, alínea daruak) hateten bainhira laiha proposta alterasaun sei la diskute, maibé kontinua diskusaun ba oin iha debate espesialidade ne’e.

Ohin, Primeiru-Ministru, Taur Matan Ruak, hahú fó ona tempu ba ministru sira fó resposta ba preokupasaun deputadu sira-nian.

Vise Bankada Parlamentár FRETILIN, Francisco Miranda Branco, haklaken FRETILIN sei aprezenta proposta kuaze 30 ba iha meza Parlamentu Nasionál, maibé seidauk bele fó-sai konteúdu proposta ba públiku.

“Ami sei aprezenta proposta kuaze tolu-nulu (30) ba meza Parlamentu Nasionál, maibé konteúdu hosi proposta ne’e ami seidauk fó-sai ba públiku”, Branco dehan, horisehik.

Purtantu, Xefe Bankada Parlamentár CNRT, Duarte Nunes, hateten proposta alterasaun ba orsamentu depende ba deputadu.

Jornalista: Evaristo Soares Martins

Editór: Xisto Freitas

HAKEREK NO HATÁN

Please enter your comment!
Please enter your name here