Primeiru Ministru, Taur Matan Ruak.Imajen/Antonio Goncalves

DILI, 17 janeiru 2020 (TATOLI)–Hafoin Parlamentu Nasionál rejeita Proposta Lei Orsamentu Jeál Estadu (OJE) 2020, Primeiru-Ministru (PM), Taur Matan Ruak, husu sidadaun sira nafatin fó konfiansa ba órgaun Estadu sira.

“Ha’u husu atu sidadaun tomak kontinua depozita konfiansa nafatin ba ita nia orgaun Estadu sira. Ha’u agradese pasiénsia no empeñamentu Prezidente Parlamentu Nasionál, nai deputadu sira husi bankada hotu ba ita-boot sira nia kontribuisaun no pasiensia hodi atura Governu ne’ebé ha’u lidera”, tenik PM Taur hafoin votasaun jeneralidade ba Proposta Lei OJE 2020 iha plenária, sesta ne’e.

Notísia Relevante: Proposta OJE 2020 La Pasa

Xefe Governu dehan, situasaun iha Parlamentu Nasionál (PN) hatudu dala ida tan katak jestaun nasaun nian iha difikuldade atu lori tuir dalan ne’ebé loos.

“Situasaun ida ne’e loke dala ida tan ba ita nia país atu tuir dalan orsamentu duodésimu. Orsamentu duodésimu iha nia implikasaun ba povu hanesan emprezáriu, sidadaun no sosiedade sira nia moris”, nia akresenta.

Nune’e, PM Taur husu ba populasaun tomak iha Timór, tantu joven sira no inan-aman sira hotu atu hakmatek iha fatin no fó konfiansa ba órgaun Estadu sira hanesan Prezidente Repúblika, Prezidente Parlamentu Nasionál, no Primeiru-Ministru rasik hodi buka solusaun ba problema sira ne’ebé iha agora no aban bainrua.

“Ita-nia nasaun hatudu dala barak iha momentu ne’ebé difísil, kadavez ita iha espíritu prezensa no reforsa ita-nia sentimentu fiar hodi buka solusaun ba ita-nia problema sira”, nia subliña.

Jornalista: Julia Chatarina

Editór: Xisto Freitas

1 KOMENTÁRIU

  1. Parabens ba MAP tmb bele kuda fl ai-kameli ho nune’e sei proteje no hamorin Fila fl TL nia naran nb identiku ho ai-kameli iha futuru. Hein ktk, aktu ida n bele haburas no habelar iha TL tomak. Ita hein!

HAKEREK NO HATÁN

Please enter your comment!
Please enter your name here