Arquimino Ramos.

Husi:

Arquimino Ramos, S.Sos, B.Bus, MM

Edukasaun maka setór ida importante Nasaun ida nia dezenvolvimentu, laiha edukasaun maka Nasaun sei labele dezenvolve iha setór sira hotu hanesan ekonomia, sosiál, kultura, siénsia, teknolojia  no sei laiha mudansa signifikativu ba Nasaun refere no sei monu ba Estadu falladu.

Atu estraga ka sobu Nasaun la presiza bom atomika hodi harahun Nasaun ida, basta hatún de’it kualidade edukasaun maka Nasaun ne’e sei monu rasik, tanba ema sei mate barak iha dotor no infermeiru sira nia liman, ponte, estrada, uma, aeroportu, portu sei estraga iha enjeñeiru sira nia liman, osan sei lakon hotu iha ekonomista sira nia liman, Nasaun sei la ba oin iha polítiku, ema ne’ebé iha poder sira nia liman, umanidade sei lakon iha relijiozu sira nia liman, sidadaun sei la-hetan atendimentu servisu públiku ho kualidade.

Nelson Mandela hatete Edukasaun maka kilat ne’ebé forsa liu atu dezenvolve ka destroy (Education is more powerful weapon to use for development or destruction).

Estadu iha obrigasaun atu dezenvolve sistema edukasaun ne’ebé kualidade atu garante dezenvolvimentu ne’ebé sustentavel, tanba rekursu naturál sira bele mohu ka hotu maibé rekursu umanu ne’ebé kualidade bele kontinua dezenvolvimentu sustentavel.

Karik Timor-Leste iha kompromisu atu dezenvolve sistema edukasaun ne’ebé kualidade? Mai ita haree polítika edukasaun hanesan tuir mai; Konstituisaun RDTL artigu 59  garante direitu sidadaun nian hodi asesu edukasaun. Lei númeru 14/2008 de 29 de outobru hatuur lei baze edukasaun Timor-Leste nian ho objetivu atu hala’o organizasaun, orientasaun, regula dezenvolvimentu sistema edukasaun. Iha artigu 1 alinea 4 kompete Estadu hodi asegura posibilidade dosente ne’ebé kualifikasaun adekuadu, infastrutura, meiu finanseiru nesesariu hodi garante edukasaun ida ne’ebé kualidade.

Governu Timor-Leste iha planu estratejiku edukasaun ne’ebé publika husi ministériu edukasaun, iha vizaun katak iha 2030 Timor-Leste sei edukadu, iha koñesementu, no kualifikadu, moris produtivu, respeita pás iha família no valór tradisionál pozitivu, ema hotu iha asesu hanesan ba edukasaun ne’ebé bele fó biban atu partisipa iha ekonomia, sosiál, prosesu dezenvolvimentu polítika, asegura equitativu sosiál, no unidade nasionál.

Atu ganante kualidade edukasaun, Timor-Leste establese sistema kontrolu liu husi instituisaun ka ajénsia sira hanesan Ajénsia Nasionál Avaliasaun, Akreditasaun Akadémiku  (ANAAA) no Institutu Nasionál de Mao da Obra (INDMO) hodi instituisaun ka eskola sira kumpre padraun no rekizitu sira ne’ebé governu estabelese.

Maske nune’e investimentu iha setór edukasaun seidauk la’o ho másimu tanba alokasaun orsamentu ne’ebé la to’o 20 % no menus husi 10% rezulta kualidade insfrastrutura ne’ebé susar, númeru rasio estudante ho profesór sira la sufisiente, númeru estudante iha sala laran liu husi 30. Grau akadémiku profesór sira la liu estudante ne’ebé sira hanorin, seidauk insentivu ba peskiza no publikasaun, sistema kontrolu ne’ebé la másimu iha eskola sira, menus fasilidade ba ema ho kondisaun defisiénsia hodi kapasita án, hadi’a kualidade moris.

Atu asegura kualidade iha padarun ne’ebé sai hanesan kritéria mínima atu eskola sira hetan lisensa ka akreditasaun maka hanesan;

  1. Misaun, atu garante funsionamentu intistuisaun sira hala’o sira nia misaun ho di’ak presiza iha lideransa ne’ebé di’ak hodi alkansa vizaun ne’ebé trasa hamutuk.
  2. Governasaun no jestaun, presiza iha governasaun ne’ebé di’ak no jestaun ne’ebé transparente.
  3. Programa akadémiku, programa estudu ne’ebé liga ho nesesidade merkadu, manorin na’in estudante sira tenke hatene vizaun no misaun atu iha asaun ne’ebé hanesan no iha kumpriensaun komun kona-ba programa nia espesifikasaun.
  4. Dezenvolve kurikulum ne’ebé bazea ba impaktu (Outcome based curriculum) ne’ebé bele liga ho merkadu nia nesesidade. Kurríkulu presiza kompozisaun husi koñesementu, abilidade no attitude (Knowledge, skills, and attitude). Mahatma Ghandi hatete Education without character is nothing Edukasaun laiha karakter maka laiha buat ida.
  5. Manorin na’in ka mestre sira ne’ebé kualidade di’ak iha koñesimentu abilidade di’ak no atitude di’ak, grau akadémiku aas liu husi estudante ka programa estudu tuir Padraun kualifikasaun nasionál Timor-Leste (Timor leste National Qualification Framework).
  6. Biblioteka no rekursu aprendizajen ne’ebé sufisiente no estudante sira bele asesu ho di’ak.
  7. Infrastrutura ne’ebé sufisiente hodi apoiu prosesu aprendizajem la ho efikas.
  8. Finanseiru ne’ebé sufisente atu garante funsionamentu sistema aprendizajem la’o ho di’ak.

Atu garante padraun sira ne’e la’o kada instituisaun ka eskola presiza iha sisteme kontrolu interna ne’ebé hala’o avaliasaun ba án rasik ka self assessment iha programa estudu hotu-hotu, iha sorin seluk presiza iha kooperasaun no kolaborasaun mos ajénsia akreditasaun nasionál no internasionál hodi asegura kualidade ne’ebé  aas.

Kualidade edukasaun la haree de’it ba pontu sira iha leten, maibé mai mos husi estudante ne’ebé iha vontade boot atu aprende, badinas, apoiu finanseiru sufisiente no oportunidade di’ak. Vontade liga ho ema nia hakarak rasik la’ós tanba ema obriga, badinas atu estuda, buka referénsia, tama aula ho disiplina, la halo kopia de’it traballu ema seluk nian, apoiu finanseiru mós fatór ne’ebé bele ajuda estudante aprende ho di’ak no iha meiu sira sufisiente, kualidade hahan ne’ebé di’ak, tuir doutrina saúde nian bainhira ema konsumu hahán ne’ebé ho nutrisaun di’ak bele ajuda ema hanoin ne’ebé lalais atu akapta siénsia, iha enerjia di’ak. Oportunidade bele mai husi ambiente hela fatin ne’ebé seguru no hakmatek hodi estuda, laiha disturbiu, ambiente eskola ne’ebé bele motiva estudante sira ho di’ak.

Iha parte seluk eskola sira sai fatin ba kretividade no inovasaun, eskola ne’ebé kreativu iha fatór sira hanesan; a) fó oportunidade ba individu idak-idak atu dezenvolve sira nia kreatividade, b) sivita akadémika sira iha oportunidade atu implementa  obra ne’ebé prodús, c) sira ne’ebé hetan idea ka gagasan iha oportunidade atu iha interasaun ho ambiente liur ka públiku.

Atividade aprendizajen la konsentra de’it iha aula maibé ho maneira oin-oin hanesan diskusaun grupu, fó projetu ka traballu individuál, role play, prátika sira tanba mundu modernu ohin kompleta ho informasaun barak iha internet  ne’ebé estudante asesu rasik, no la bosan iha aula laran.

Matenek na’in  naran Jack Ma hato’o katak” You  should learn from your competitor but never copy, Copy and you die. O bele estuda ka aprende husi o nia kempetitór maibé labele kopia, kopia maka o mate.

Ho ida ne’e atu konklui katak investimentu iha setór edukasaun iha Timor seidauk másimu tuir mehi ne’ebé Timor-Leste iha atu atinje iha 2030, tanba sei menus iha investimentu liu-liu alokasaun orsamentu ne’ebé menus husi 10%.

Atu rekomenda ba Estadu atu 1) hasae alokasau orsamentu ba área edukasaun hodi investe iha fasilidade sira iha eskola, 2) hasa’e kapasidade manorin na’in sira, 3) insentiva iha kreatividade no inovasaun, 4) hala’o kontrolu ne’ebé másimu ba sistema aprendizajen iha Timor-Leste, kria ambiente ne’ebé seguru no hakmatek, hasae krezimentu ekonomia ne’ebé bele hasa’e rendimentu família nian, fó oportunidade ne’ebé hanesan ba sidadaun atu asesu ba edukasaun.

Opiniaun ida ne’e hato’o ona iha konsultasaun públika kona-ba implementasaun SDG4 iha Timor-Leste ne’ebé organiza husi sosiedade sivil CSEP (Civil Society for Education Partnership) iha dia 10 janeiru 2020.

Hakerek na’in hanesan dosente Fakuldade Siénsia Sosiál e Umanu-UNPAZ no Estudante Programa Doutoramentu Jestaun Estratejiku, Universidade Widya Mandala Surabaya.

HAKEREK NO HATÁN

Please enter your comment!
Please enter your name here