Ministru Agrikultura no Peska, Joaquim José Gusmão dos Reis Martins. Imajen/Antonio Goncalves.

DILI, 17 janeiru 2020 (TATOLI) – Ministru Agrikultura no Peska, Joaquim José Gusmão dos Reis Martins, hateten sei la hola fahi iha 2020 tanba la prevee iha proposta Orsamentu Jerál Estadu (OJE) Ministériu Agrikultura no Peska (MAP).

“Proposta OJE 2020 ne’ebé aloka atu hola fahi laiha maibé OJE 2019, ita sei iha stock fahi maibé ita sei haree virus ASF ne’ebé iha, bainhira laiha maka ita bele fahe”, ministru ba Ajénsia TATOLI iha Parlamentu Nasionál, ohin.

Antes ne’e, MAP sosa ona fahi rasa hamutuk 150 husi Indonézia ho orsamentu rihun $33 hosi OJE 2019 nian, maibé ministériu sei pendente atu fahe tanba sei haree moras African Swine Fever (ASF) ne’ebé iha.

Notísia relevante : MAP Sosa Fahi Rasa 150 husi Indonézia

“Ita sei haree hela moras ne’e, hafoin ita haruka kompañia lori tama fahi mai, nune’e ita bele prepara hodi tau iha sentru peskiza animál nian, depois ita prodús fali fini hafoin ita bele troka fali animál sira ne’ebé mate”, salienta.

Maske nune’e, MAP tau de’it orsamentu ba fini-karau lokál, fini-bibi no hakarak hasa’e tan produsaun liuhusi inseminasaun artifisiál, tanba iha ona susesu iha Maliana no Suai, nune’e maka MAP hakarak aumenta númeru inklui karau 90, hosi ne’e, MAP prevee orsamentu 2020 hamutuk rihun $36.

Antes ne’e, Diretór Jerál Pekuária no Veterinária MAP, Domingos Gusmão, dehan fahi rasa ne’e sosa husi kompañia Mota Loes, Lda, bazeia ba proposta husi Diresaun Jerál Pekuária no aprova husi Ministru Agrikultura no Peska, Joaquim José dos Reis Martins, no konkursu liuhusi aprovizionamentu MAP nian.

Tuir planu fahi rasa ne’e tau iha sentru hakiak fahi iha Atabae, hodi tékniku sira halo inspesaun no distribui kedan ba benefisiáriu sira.

Entretantu, tuir dekretu lei Kuarentena no Bioseguransa nú. 21/2003, artigu 56 define klaramente katak bandu importasaun fahi no produtu fahi husi nasaun sira ne’ebé afetadu moras ASF. Bainhira moras ne’e la’o namanas iha Ázia.

Daudaun ne’e, kompeténsia Ministériu Agrikultura nian maka oinsá atu aplika tékniku adekuadu atu fó bioseguransa ba fahi sira ne’e atu labele afeta ba moras ASF ne’e hodi fó ba benefisiáriu sira atu sira bele hakiak.

Hatán ba moras ASF bele afeta fahi sira ne’e, nia dehan tuir tékniku MAP mós iha membru OIE (Organizasaun Mundiál Saúde) ne’ebé delegadu OIE sempre fó relatóriu kona-ba moras animál kada semana no fulan.

Fahi rasa ne’e sosa iha Kupang-Indonézia no livre husi moras ASF ne’ebé Governu rekomenda ne’e bele tama.

MAP liuliu ekipa Diresaun Pekuária no Veterinária komesa atentu liuliu médiku veterináriu hodi hametin bioseguransa nian hodi fahi hirak ne’ebé tama labele afeta moras ASF no mate tan.

Jornalista : Zezito Silva

Editora : Maria Auxiliadora

HAKEREK NO HATÁN

Please enter your comment!
Please enter your name here