Ministru Prezidensia Konsellu Ministru, Hermenegildo Augusto Cabral Pereira.

DILI, 17 janeiru 2020 (TATOLI)—Ministru Estadu Prezidénsia Konsellu Ministru, Hermenegildo Augusto Cabral Pereira hateten Komisaun Revizaun Orsamentu nível Polítika (KROP), halo redusaun justu ba instituisaun hotu-hotu.

Hermenegildo ‘Agio’ Pereira ko’alia asuntu ne’e tanba kinta horisehik, Deputadu Bankada Partidu Demokrátiku (PD), Adriano do Nascimento, preokupa ho kategoria hosi ministériu balun ko’a totál.

“Ha’u preokupa tanba Ministériu Transporte no Telekomunikasaun ninia Kapitál Menór ko’a hotu. Ha’u husu ba ministru, nusá ita boot nia uma-laran dasa moos hotu”, Deputadu Adriano do Nascimento levanta iha plenária.

Deputadu PD ne’e preokupadu ho kritériu redusaun ne’ebé aplika hosi KROP ne’ebé lidera hosi Agio Pereira.

Hatán ba preokupasaun ne’e, Ministru Estadu Prezidénsia Konsellu Ministru, Hermenegildo Pereira, esplika katak kritériu Komisaun Revizaun Orsamentál halo justisa ida justu ba instituisaun hotu-hotu.

“Primeiru kritériu ida maka redusaun orsamentál atu halo justisa ba instituisaun hotu-hotu, hahú hosi Prezidénsia Repúblika to’o munisipalidade, ne’ebé komisaun implementa duni no komisaun mós respeita desizaun Parlamentu nian”, nia fó resposta liuhosi debate jeneralidade proposta OJE 2020 loron ikus, iha plenária Parlamentu Nasionál, sesta ne’e.

Agio Pereira hatutan, kritériu ida tan maka halo komparasaun ba orsamentu 2019. Kritériu ida-ne’e importante atu asegura devér kontratuál ezistente 2019 nian.

Nia dehan, hafoin ministériu no instituisaun sira prenxe kritériu hirak-ne’e hodi distribui envelope fiskál, fó tempu ba halo análize no ikus mai simu fali impaktu hosi proposta korte sira (redusaun).

Metodolojia ida tan, tuir Agio, maka permite mós ministériu sira halo ajustamentu internu hodi permite Diresaun Nasionál Orsamentu prepara livru relevante ba Parlamentu Nasionál.

“Komisaun Revizaun Orsamentu hanoin katak labele destroi atividade ekonómika. Tanba ne’e maka komisaun asegura duni millaun $798 ba atividade ekonómika inklui dezenvolvimentu infraestrutura”, nia esplika.

Jornalista: Evaristo Soares Martins

Editór: Xisto Freitas

HAKEREK NO HATÁN

Please enter your comment!
Please enter your name here