Ministra Finansa ein ezersísiu, Sara Lobo Brites, hamutuk ho Diretór Jerál Ministeriu Finansa, hala’o audiensia ho Komisaun C, D No E kona-ba OJE 2020. Imajen/TATOLI Egas Cristovao.

DILI, 17 janeiru 2020 (TATOLI) – Ministra Finansa ein funsaun, Sara Lobo Brites, hateten iha proposta Orsamentu Jerál Estadu (OJE) 2020, Governu liuhosi Ministériu Finansa (MF) koloka plafond ka tetu millaun $750 hodi rekorre ba empréstimu konsensuál.

“Ko’alia kona-ba dívida empréstimu konsensuál, maka tinan ida ne’e, Governu mós koloka plafond millaun $750 atubele rekorre ba iha empréstimu konsensuál. Ida ne’e lei maka rekere, Governu sei la halo negosiasaun bainhira la aprova hosi Parlamentu Nasionál (PN), tanba ne’e maka ami tau millaun $750 bazeia ba programa sira ne’ebé maka hakarak implementa iha tinan 2021”, Sara Lobo Brites informa iha debate proposta OJE 2020 iha faze jeneralidade ba loron datoluk iha PN, ohin.

Atuál Vise-Ministra Finansa ne’e dehan bainhira tau tetu ida hanesan ne’e, la ba hetan kedas iha 2020 nia laran tanba ne’e sei lori tempu tinan rua ou tolu.

“Esperiénsia uluk katak lori tempu naruk uitoan para ita bele finansiamentu hosi empréstimu konsensuál”, afirma.

Governante ne’e esklarese katak osan millaun $750 ne’e mai hosi saida de’it mak, primeiru; Timor-Leste hakarak kontinua investe iha Estrada hanesan iha Postu Administrativu Maliana, Oeleo, Tilomar, Lautem-Lospalos, Viqueque, Maubara, Hatulia, Batugadé, Balibó ho estimativa ida pur volta millaun $276.

“Ita mós iha planu atu halo estensaun ba iha Aeroportu Internasionál Nicolau Lobato tanba ita nia pista badak ne’ebé presiza estensaun, ne’ebé ami tau millaun $50, prevee mós millaun $200 ba programa kosta súl, bee no saneamentu ba munisípiu sira hanesan Lautem, Viqueque, Baucau, Manufahi tau osan millaun $55, vibra ótika millaun $39 no mós ba programa edukasaun pur volta millaun $30. Ne’e estimativa ne’ebé maka ami halo, númeru sira ne’e númeru ne’ebé maka ami projeta de’it”, Sara esplika.

Preokupasaun kona-ba dezempeñu empréstimu, Sara Lobo Brites salienta, loos duni ne’e krusiál. “Ita la tuir kontratu ne’ebé ita asina ne’e, sei fó prejuizu ba prósimu empréstimu bainhira ita hakarak rekorre filafali, tanba ita hotu hatene katak empréstimu konsensuál ne’e rai hothotu hakarak, ne’e hanesan kompetisaun ida ne’ebé se maka lalais nia maka sei hetan, pur tantu ita-nia dezempeñu ladi’ak ne’e kontribui kedas ba iha ita-nia pozisaun ho parseiru sira”.

Sara dehan, preokupasaun ne’e hato’o tiha ona ba iha ministériu relevante atu tau matan, tanba ne’e mós arriska kredibilidade Estadu, ne’ebé hothotu presiza duni atu konxiente no atensaun didi’ak para labele fó prejuizu iha futuru.

Notísia relevante : Timor-Leste Halo Ona Empréstimu Millaun $457, 51

Jornalista : Antónia Gusmão

Editora : Maria Auxiliadora 

HAKEREK NO HATÁN

Please enter your comment!
Please enter your name here