Primeiru-Ministru, Taur Matan Ruak. Imajen Tatoli/Egas Cristovão

DILI, 17 janeiru 2020 (TATOLI)—Primeiru-Ministru (PM), Taur Matan Ruak, hateten hafoin orsamentu dada-fila hosi Parlamentu Nasionál, Governu halo ona ezersísiu boot iha redusaun kada ministériu.

Xefe Governu esklarese, Governu ida mai ho programa, planeiamentu no orsamentasaun, maibé hanesan Xefe-Governu tenke kontrolu modelu planeiamentu no orsamentasaun.

“Ita-boot sira dehan Governu nia kapasidade ezekusaun to’o de’it biliaun $1,3, ne’e ita tenke halo ezersísiu boot para fahe osan hodi kanaliza osan iha liña ministeriál. Ne’e ezersísiu boot ne’ebé Ministériu Finansa halo ona”, Primeiru-Ministru, Taur Matan Ruak, ko’alia iha debate faze jeneralidade OJE 2020 loron ikus, iha Parlamentu Nasionál, sesta ne’e.

Xefe Governu ko’alia asuntu ne’e relasiona ho Deputadu Bankada FRETILIN, Joaquim dos Santos, ne’ebé hateten orsamentu ida-ne’e la prevee buat ruma kona-ba tinan rua ka tolu hatama fali reseita ba Estadu.

“Ha’u haree orsamentu ida-ne’e la deskreve buat ruma oinsá hatama reseita ruma ba ita-nia Estadu”, Deputadu Joaquim levanta iha plenária, kinta (16/01).

Hatán ba preokupasaun ne’e, Xefe Governu deklara reseita doméstika prevee sei aumenta iha 2020, atinje millaun $210,5. Previzaun %5 boot liu kompara ho tinan 2019.

Primeiru-Ministru informa reseita doméstika iha tinan 2017 no 2018 ki’ik tanba impede hosi inserteza polítika.

Taur haklaken, ho orsamentu ida-ne’e sei mellora atividade setór privadu, estabilidade polítika no kontinuasaun investimentu iha infraestrutura.

Xefe Governu hein katak serbisu barak hosi reforma fiskál no jestaun finansa públika sei fó mós reseita ba Estadu iha futuru.

Ikus liu, Xefe Governu dehan, redusaun ne’e Governu halo bazeia ba rekomendasaun hosi Parlamentu Nasionál, tanba proposta anteriór ho montante biliaun $1,950 tun ba biliaun $1,668.

Jornalista: Evaristo Soares Martins

Editór: Xisto Freitas

HAKEREK NO HATÁN

Please enter your comment!
Please enter your name here