Prezidente Tribunál Rekursu, Deolindo dos Santos. Imajen/Tatoli

DILI, 17 janeiru 2020 (TATOLI)–Prezidente Tribunál Rekursu (PTR), Deolindo dos Santos informa ba Prezidente Repúblika katak, durante tinan 2019, juíz husi Tribunál sira esforsu maka’as hodi halo redusaun ba prosesu kazu pendente sira. 

Hafoin enkontru ho Xefe Estadu iha Palásiu Prezidente Nicolau Lobato, Bairru Pité, Dili, ohin, Deolindo hateten durante enkontru informa kona-ba desizaun Tribunál nian ba prosesu kazu pendente sira mak hanesan, tinan 2019 iha Tribunál Distritál Baucau kazu krime pendente komesa ho kazu 900-resin, no iha tinan nia rohan (fim do ano) hela ho kazu 800-resin.

Kona-ba kazu sivíl, komesa ho kazu pendente 300-resin no oras ne’e redús uitoan, maibé mantein ho númeru 300-resin tanba bainhira tribunál deside daudaun, prosesu mós tama nafatin.

“Iha Tribunál Rejionál Oé-Cusse, kazu krime pendente hamutuk 300-resin, agora hela 200-resin. Kazu sivíl pendente hamutuk 200-resin no agora mantein 200-resin”, nia esplika.

Iha Tribunál Distritál Dili, kazu pendente hamutuk 2.000, ho tan kazu foun ne’ebé tama, tanba ho desizaun ne’ebé mak sai, entaun iha kazu pendente hamutuk 1.000-resin.

“Husi prosesu 2.000-resin tun ba 1.000-resin. Ne’e signifika desizaun hasai iha tinan 2019, konsege hasai prosesu kazu 1.000-resin”, nia dehan tan.

Iha tinan 2019, nia haktuir, Tribunál Rekursu komesa ho kazu krime pendente 300-resin no iha 2020 hahú ho kazu krime pendente hamutuk prosesu 71. Ne’e signifika katak nia tun liu pursentu 50. Kona-ba kazu sivíl iha 2019 hamutuk prosesu 91, agora daudaun komesa ho prosesu 15.

“Ida-ne’e mak husi parte Tribunál nian, juíz sira esforsu daudaun no ita espera katak ho mudansa ne’ebé mak ita sei halo iha tempu badak nia laran iha 2020, ita bele redús prosesu sira ho númeru ne’ebé barak liután”, Deolindo espera.

Ho ida ne’e maka, Deolindo haklaken, iha tinan 2020 Tribunál prevee orsamentu atu bele kria kondisaun di’ak atu fasilita juíz sira bele halo serbisu ho forma ne’ebé di’ak liután.

Antes ne’e, Prokuradór Jerál Repúblika (PJR), José da Costa Ximenes rekoñese katak Tribunál halo mudansa la’ós iha prosesu ba kazu sivíl de’it, maibé mós ba kazu krime sira.

“Tuir ha’u-nia haree katak Prezidente Tribunál Rekursu halo mudansa uitoan, tanba transfere juíz sira balun no ha’u haree katak iha rezultadu di’ak. Julgamentu sira ne’ebé la’o ona, la’ós husi kazu sivíl de’it, maibé kazu krime mós ha’u haree la’o ona no ita espera katak bele la’o di’ak liután”,  PJR dehan.

“Ida-ne’e kestaun Tribunál nian ne’ebé ha’u labele intervein, maibe, pontu devista pozitivu ne’ebé ita iha maka agora ne’e prosesu barak ne’ebé komesa la’o di’ak loos”, nia hatutan.

Jornalista: Cipriano Colo

Editór: Xisto Freitas

HAKEREK NO HATÁN

Please enter your comment!
Please enter your name here