DILI, 17 janeiru 2020 (TATOLI)–Deputadu Bankada Partidu Demokrátiku (PD), Mariano Assanami Sabino hateten Orsamentu Jerál Estadu (OJE) 2020 hanesan raan ba Estadu tanba ne’e importante rebes ba dezenvolvimentu.
“PD iha pozisaun ida-ne’ebé klaru kedas iha inísiu orsamentu ne’e dada tanba haree ba kolokasaun ne’e boot liu tiha fali. Maibé, en prinsípiu, orsamentu ne’e raan ba Estadu, tan ne’e PD nia pozisaun apoiu atu hala’o dezenvolvimentu,” Assanami dehan iha debate jeneralidade OJE 2020 iha Parlamentu Nasionál, sesta ne’e.
Nia dehan, agora daudaun pursentu husi orsamentu ne’e la’o loos ona hanesan Bens no Servisu pursentu 35, Saláriu no Vensimentu pursentu 14, Transferénsia Públika pursentu 19, Kapitál Menór pursentu 1.9 no Kapitál Dezenvolvimentu pursentu 29.
Entretantu, kolokasaun OJE ba área Saúde pursentu 3,5, Edukasaun pursentu 5, Agrikultura pursentu 1, Turizmu pursentu 0.5, Infraestrutura pursentu 18, Ekonomia pursentu 8, Sosiál pursentu 10, Defeza no Seguransa pursentu 7 no Boa Governasaun pursentu 13.
“Atu halo reflesaun ida de’it., osan sira durante ne’e ita uza osan hosi petróleu. Tanba ne’e, ha’u mós apoiu programa Governu nian ne’ebé atu harii parke indústria. Ida-ne’e dalan ida atu hatama osan mai Estadu. Ida mós mak ita tenke tau importánsia ba setór produtivu. Maibé, ita haree iha agrikultura ne’e pursentu 1 no turizmu foin mak pursentu 0. 5 de’it,” Assanami subliña.
Nia hatutan, atu dezenvolve di’ak área agrikultura bainhira iha nia tempu sei hanesan Ministru Agrikultura sadik ona membru Parlamentu sira atu tau osan barak tinan lima bele halakon importasaun hahán hosi rai-li’ur.
“Agrikultura bainhira ha’u ko’alia povu bele dehan kle’ur iha-ne’ebá (nu’udar Ministru Agrikultura) nusá la halo buat ruma. Deputadu sira iha-ne’e balun mós hanoin nune’e. Maibé, ha’u sadik deputadu sira kuandu iha ha’u-nia tempu, se tau osan tuir hau-nia estimasaun, tinan lima ne’e hahán la mai tan ona hosi rai-li’ur maibé tau osan ho pesimista, ida-ne’e mak dada naruk to’o hanesan ne’e,” nia haklaken.
Nia akresenta, agrikultura buat ne’ebé fásil atu rezolve tanba iha bee, loromatan no rai. Bee mak sai hanesan problema boot.
“Ida-ne’e maka ha’u hakarak husu tanbasá mak ita la tau osan ba barajen,” nia tenik.
Tanba ne’e, nia promete, iha diskusaun espesialidade nia sei halo proposta oinsá tau osan haree ba bee nian.
Jornalista: Hortençio Sanchez
Editór: Xisto Freitas
