Situasaun Diskusaun Jeneralidade Proposta Orsamentu Jerál Estadu 2020 iha Parlamentu Nasional. Imajen/ Antonio Goncalves

DILI, 17 janeiru 2020 (TATOLI)—Bankada Parlamentár Congresso Nacional da Reconstrução de Timor (CNRT), afirma sei vota ba proposta Orsamentu Jerál Estadu (OJE) 2020 ho konsiénsia.

Xefe Bankada CNRT, Duarte Nunee, hateten Governu ida-ne’e laiha konsiderasaun prioridade Governu sira antes ne’e.

“Ho orsamentu ne’ebe ita debate daudaun ne’e ho prinsípiu dehan atu hadi’a povu nia moris, maibé hafoin ami análize, realmente Parlamentu Nasionál haree estrutura sei presiza hadi’a tan. Haree ba situasaun ida-ne’e, hosi bankada CNRT liuhosi deputadu, sei uza sira-nia vota tuir konsiénsia”, dehan nia liuhosi plenária, sesta loraik ne’e, molok hakat ba votasaun.

Nia konsidera orsamentu ne’ebé ho montante 1,6 ne’e atu finansia ba Estadu tomak, maibé buat ne’ebé Oitavu Governu hasoru maka  ukun ho ain karuk, tanba ain loos hela tiha iha Prezidente Repúblika. Situasaun ne’e lori povu sofre tanba infrakese ekonomia.

“Ita hotu hatene hela katak mosu impase maibé órgaun Estadu sira laiha kapasidade atu ultrapasa situasaun ne’e. Se situasaun ne’e maka la ultrapasa, ita bele lori nasaun ne’e ba faleseu (mate). Tanba ne’e, ita presiza tau iha konsiderasaun. Ita tenke ultrapasa”, Duarte realsa.

Iha biban ne’e, Duarte konsidera katak CNRT maka sofre liu iha konjuntura polítika oras ne’e daudaun.

“Tuir ami-nia análize, CNRT mak sofre. Durante tinan-rua ami hetan persegisaun ne’ebé la justu tanba akuza CNRT nia ema komete atu oioin. Ami konsidera hanesan persegisaun ida-ne’ebé organizadu. Ami lamenta. Órgaun Estadu sira la muda dalan atu ultrapasa situasaun ida-ne’e”, nia informa.

Nia mós dehan katak CNRT sente sei problema boot atu atinje Planu Estratéjiku Dezenvolvimentu Nasionál (PEDN) 2011-2030 tanba ezekusaun OJE tinan hirak nia laran ne’e ladún fó atensaun ba planu estratéjiku refere.

Jornalista: Evaristo Soares Martins

Editór: Xisto Freitas

HAKEREK NO HATÁN

Please enter your comment!
Please enter your name here