Prezidente Partidu Demokratiku (PD), Mariano Assanami Sabino. Imajen/dok.TATOLI

DILI, 17 janeiru 2020 (TATOLI)–Deputadu Bankada Partidu Demokrátiku (PD), Mariano Assanami Sabino hateten dezenvolve setór agrikultura la’ós iha de’it rai-maran maibé dezenvolve mós iha tasi-laran.

“Ko’alia kona-ba agrikultura la’ós ko’alia de’it iha rai-maran maibé ko’alia mós iha tasi-laran. Uluk kedas ita ko’alia kona-ba lakon ikan barak maibé ita la tau osan. Agora atu tau osan ba ró patrollu. Maibé, ita iha ona Unidade Marítima ne’ebé mak iha Ministériu Agrikultura nia tutela no Ministériu Defeza no Seguransa atu fó seguransa ba tasi,” Assanami ko’alia iha debate jeneralidade Orsamentu Jerál Estadu (OJE) 2020 iha Parlamentu Nasionál, sesta ne’e.

Nia dehan, ministériu hirak-ne’e tenke integradu ka serbisu hamutuk atu fó seguransa ba tasi nune’e bele prevene ikan lakon.

“Ida-ne’e tempu ona atu serbisu hamutuk. Lae ita husik hela ema mak aproveita ita-nia ikan. Agora, prioridade ba agrikultura tenke tau ona osan ba asuntu ne’e,” Assanami sujere.

Iha parte seluk, nia mensiona, ko’alia kona-ba estrada, antes 2017 mai ne’e programadu hotu ona atu halo ramata tanba tuir kategoria estrada nasionál, rejionál no estrada rurál.

“Loloos ne’e ita debe ho ita-nia osan rasik nia tenke ramata ona. Nusá maka dada beibeik to’o ohin loron,” Prezidente PD ne’e kestiona.

Estrada sira ne’ebé konstrui ho orsamentu impréstimu maka hanesan estrada ligasaun Dili-Manatuto-Baucau, Baucau-Viqueque, Baucau-Lautém, Dili, Aileu, Liquiçá, Bobonaro, Ainaro, Covalima, Manufahi no Ermera.

Jornalista: Hortençio Sanchez

Editór: Xisto Freitas

HAKEREK NO HATÁN

Please enter your comment!
Please enter your name here