DILI, 17 janeiru 2020 (TATOLI)—Ministru Reforma Lejizlativa no Asuntu Parlamentár no Ministru Koordenadór Asuntu Ekonomia Interinu, Fidelis Manuel Leite Magalhães hateten, tuir dadus ne’ebé Governu asesu hosi Banku Mundiál katak ekonomia Timor-Leste tinan 2019 nian iha dalan ba rekuperasaun.
“Dadus hosi Banku Mundiál no livru ne’ebé ami fornese mós hatudu ba públiku katak konsidera ekonomia nia kontrasaun iha 2017-2018 tun maka’as. Maibé, iha 2019 ne’e ita nia ekonomia iha ona dalan ba rekuperasaun,” Fidelis dehan liuhusi ninia intervensaun iha diskusaun jeneralidade Orsamentu Jerál Estadu (OJE) 2020 iha Parlamentu Nasionál, sesta ne’e.
Tanba ne’e, nia informa, Governu rejistu kreximentu ekonomia pozitivu sa’e kuaze pursentu 4 iha tinan kotuk (2019).
“Ida-ne’e la’ós fonte Governu nian de’it maibé Banku Mundial nian. Entaun, ita bele dehan ita-nia ekonomia rekupera ona,” ministru ne’e haklaken.
Tuir Relatóriu Banku Mundiál ne’ebé fó sai iha tinan kotuk (2019), ne’ebé Agência Tatoli asesu, sesta ne’e, hateten ekonomia ka Produtu Internu Brutu (PIB) Timor-Leste iha 2019 rekupera ba pursentu 3,9 hafoin tinan rua tutuir malu (2017-2018) monu tanba kauza hosi inserteza polítika.
Relatóriu ne’e esplika PIB sa’e ba pursentu 3,9 tanba senáriu ida hosi estabilidade ekonomia no polítika ne’ebé avansu, liuliu tanba gastu públiku ne’ebé boot implika ba konsome privadu ne’ebé forte.
Jornalista: Hortençio Sanchez
Editór: Xisto Freitas
