Diskusaun proposta OJE 2020 iha plenária Parlamentu Nasionál, kinta (16/01/2020). Imajen Tatoli/ Egas Cristóvão

DILI, 16 janeiru 2020 (TATOLI)—Primeiru-Ministru (PM), Taur Matan Ruak, hateten reseita doméstika rai-laran seidauk bele selu saláriu no vensimentu iha Estadu ida-ne’e.

“Realidade hatudu reseita fiskál iha rai-laran la liu millaun $200. Tan ne’e, la to’o atu selu ita-nia saláriu no vensimentu”, Xefe Governu ko’alia iha debate jeneralidade proposta OJE 2020 loron daruak, iha plenária Parlamentu Nasionál, kinta ne’e.

Xefe Governu rekoñese Governu dada fila proposta anteriór tanba orsamentu boot no risku ba sustentabilidade fundu petrolíferu.

Ho proposta foun ne’e, Xefe Governu espera polítika reforma fiskál sei hatama reseita ba Estadu ida-ne’e iha futuru.

Tuir Livru Panorama Orsamentál, reseita doméstika sei aumenta iha 2020 ho montante millaun $210,5, pursentu 5 kompara ho tinan 2019.

Reseita doméstika iha 2017 no 2018 menus tanba inserteza politika, restrisaun iha orsamentu no dezempeñu makro ekonómiku ne’ebe ladún di’ak. Prevee katak reseita doméstika sei iha mundansa pozitiva iha 2020. Ambiente pozitivu ida-ne’e tanba melloramentu iha atividade setór privadu, estabilidade polítika no kontinuasaun investimentu iha infraestrutura.Tendénsia pozitivu makro ekonómiku ida-ne’e espera sei kontinua to’o tinan 2024.

Primeiru-Ministru tenik sei iha kreximentu reseita doméstika ne’ebé pozitivu, maibe Timor‐Leste sei depende ba reseita mina‐rai liu pursentu 80 hosi totál reseita.

Tanba ne’e, serbisu barak hosi polítika reforma fiskál no jestaun finansa públika presiza hetan aprovasaun hosi Parlamentu Nasionál, nune’e bele kobre impostu hosi setór oin-oin.

Jornalista: Evaristo Soares Martins

Editór: Xisto Freitas

HAKEREK NO HATÁN

Please enter your comment!
Please enter your name here